Qazaqstanda áýe kompanıasynyń kinásinen ýaqytynda usha almaǵan jolaýshynyń zań boıynsha qandaı quqyqtary bar?
Azamattyq avıasıa komıteti tóraǵasynyń orynbasary Darhan Katyshev bılet alarda ne nársege mán berý keregin túsindirdi.
Shaǵym kóp ekenin moıyndaımyz. Áleýmettik jelilerde, ózimizge de aryzdar túsip jatady. Jolaýshylarǵa eń aldymen aıtarymyz – bılet alarda tarıfke qaraý kerek. Mysaly, Fly Arystan-nyń 15 túrli tarıfi bar. Aqshasy qaıtarylatyn tarıf te, qaıtarylmaıtyn tarıf te bolady. Árqaısysynyń baǵasy da ártúrli, - dedi ol.
Katyshev bılet satyp alarda onyń erejelerine nazar aýdarý keregin eskertti. Qaǵıdalarda bılet qunyn qaı kezde qaıtaratyny, qashan qaıtarmaıtyny nemese vaýchermen beriletini naqty jazylady.
Sonymen qatar, Qazaqstanda áýe kompanıasynyń kinásinen ýaqytynda usha almaǵan jolaýshynyń zań boıynsha mynandaı quqyqtary bar:
2 saǵattan artyq kútken jaǵdaıda – eki telefon qońyraýyn shalý jáne eki elektron hat jiberý múmkindigi;
2 saǵattan artyq kútken jaǵdaıda – salqyn sýsyndarmen qamtamasyz etý;
kúndiz 6 saǵattan, túnde 8 saǵattan artyq kútken jaǵdaıda – ystyq tamaq berý;
"Ana men bala" bólmesine (bolsa) kirý múmkindigi;
6–8 saǵattan artyq kútken jaǵdaıda – qonaqúı men oǵan deıingi transfer;
5 saǵattan artyq keshikkende – ushýdan bas tartyp, bılet aqshasyn tolyq qaıtaryp alý.
5 saǵattan artyq kútken adam ushýdan bas tartyp, bılet aqshasyn qaıtara alady. Qaıtarymsyz tarıfpen alynǵan bılet bolsa da, tolyq aqshasyn alyp, ushýdan bas tartýǵa quqyǵy bar.