Oqý mınıstri Ǵanı Beısembaev jańa oqý jylynda mektep baǵdarlamasynda qandaı ózgerister bolatynyn aıtty, dep habarlaıdy aqshamnews.kz
Mınıstrdiń aıtýynsha, qazirgi ýaqytta elimizdegi 8 myńnan astam mektepte 4,1 mıllıon oqýshy bilim alýda.
"Bıyl birinshi synypqa 341 myń bala qabyldanady. 11-synypqa 232 myń oqýshy ótti. Jańa oqý jylynyń ereksheligi – jasandy ıntellektti orta bilim berý júıesine engizý bolmaq. Osyǵan oraı "Sıfrlyq saýattylyq" pen "Informatıka" pánderine jasandy ıntellekt quraldary kiriktirilip, etıkalyq standarttar bekitildi. 1–11-synyp oqýshylaryna arnalǵan "Day of AI" onlaın kýrstary ázirlendi, sondaı-aq muǵalimderge arnalǵan kýrstar uıymdastyrylady", – dedi Ǵanı Beısembaev.
Mınıstr sondaı-aq Memleket basshysynyń tapsyrmasy boıynsha jańa oqý jylynan bastap "Keleshek mektepteri" basqarý modeli iske qosylatynyn atap ótti.
"Ol úshin jańa basqarý standarty qabyldandy, akredıtasıa standarttary ázirlendi. Úsh deńgeıli kýrstan ótken 3 myńnan astam pedagog bıylǵy oqý jylynda jańa júıede jumysyn bastaıdy", – dedi mınıstr.