Áleýmettik mańyzy bar azyq-túlik taýarlarynyń (ÁMAT) baǵasyn turaqtandyrý sharalary aıasynda «Almaty» ÁKK» AQ «NAURYZ AGRO KZ» JSHS qus fabrıkacymen 205,2 tonna taýyq etin (san eti, jambasy) jetkizý jáne satý týraly qaryz shartyna qol qoıdy. Bul týraly «Almaty» ÁKK» habarlady.
Baǵany turaqtandyrý merzimi – 24 aı. Óndirýshiniń kóterme baǵasy – kelisine 1 150 teńge, taýarǵa qosylatyn ústemesi 15%-dan aspaıdy. Ónim iri saýda jelilerinde jáne basqa da satý oryndarynda qoljetimdi bolady.
Buǵan deıin «Almaty» ÁKK» «Magnum Cash&Carry» JSHS-men kartop, sábiz, pıaz jáne qyryqqabatty belgilengen tómendetilgen bólshek baǵamen satý jóninde forvardtyq qaryz shartyna qol qoıǵan. Kókónister Almaty, Jambyl, Pavlodar jáne Qaraǵandy oblystaryndaǵy aýyl sharýashylyǵy taýar óndirýshilerinen 10 440 tonna kóleminde satyp alynady. Baǵany turaqtandyrý 2025 jyly 1 qyrkúıekten bastalyp, 2026 jylǵy sáýirdiń sońyna deıin jalǵasady.
Sondaı-aq «Magnum Cash&Carry» JSHS-men 11 ataý boıynsha ÁMAT baǵasyn turaqtandyrýǵa arnalǵan qaryz sharty bar. Oǵan qaraqumyq, kúrish, rojkı (salmaqpen), kúnbaǵys maıy (Maı zaýyty №1), maılylyǵy 2,5% aıran (jumsaq qaptamada), maılylyǵy 72,5% sary maı, maılylyǵy 2,5% pasterlengen sút (jumsaq qaptamada), taýyq eti (san eti, jambasy), birinshi surypty un, sıyr eti (tós eti) jáne tuz kiredi. Baǵany turaqtandyrý merzimi 2026 jylǵy naýryzǵa deıin.
Buǵan qosa, buryn jasalǵan qaryz sharttary aıasynda «Alataý-Qus» AQ jáne «Sarybulak» JSHS qus fabrıkalary qaladaǵy «Alataý-Qus» fırmalyq dúkenderine 1 818 tonna taýyq etin, sondaı-aq iri saýda jelilerine, «Alataý-Qus» dúkenderine jáne «úı irgesindegi» dúkenderge birinshi sanattaǵy 86,4 mln dana jumyrtqa jetkizýdi jalǵastyrýda. Sonymen birge «Kókshetaý sút zaýyty Belogore» JSHS-nen 170 myń lıtr kóleminde maılylyǵy 2,5% sút belgilengen tómendetilgen baǵamen mınımarketter arqyly satylady.
Qant baǵasyn turaqtandyrý maqsatynda otandyq qumsheker saýda jelilerinde óndirýshiniń belgilengen kóterme baǵasymen – kelisine 380 teńgeden, taýarǵa qosylatyn ústemesi 10%-dan aspaıtyn mólsherde satylýda.
Barlyq ÁMAT ónimi «Magnum», «Small», «Alataý-Qus» fırmalyq dúkenderi men «úı irgesindegi» dúkenderde óndirýshiniń kóterme baǵasynan 15%-dan aspaıtyn taýarǵa qosylatyn ústemesimen satylady.
Ónimderdiń belgilengen baǵasy men satý oryndarynyń mekenjaılary «Almaty» ÁKK»-nyń www.almatyazyk.kz saıtynda jarıalanǵan.