Almatydan Atyraýǵa ushqan ushaq kóterilgennen keıin 15 mınýttan soń áýejaıǵa oraldy: jolaýshylardyń biri jedel mıokard ınfarktyn alǵan.
Ushaq jerge qonǵannan keıin er adam jedel járdem dárigerlerine tapsyrylyp, shuǵyl túrde Almaty №4 qalalyq klınıkalyq aýrýhanasyna jetkizildi.
«Naýqastyń jaǵdaıy óte aýyr dep baǵalandy, kardıogendik shok oryn alyp, qan qysymy tómendedi, qatty entigý, aýyrsyný baıqaldy. Oǵan shuǵyl jasalǵan koronarlyq angıografıada úsh tamyrdyń zaqymdanǵany anyqtaldy. Júrek qanmen úsh negizgi arterıa arqyly qamtamasyz etiledi. Eki koronarlyq arterıa, oń jaq koronarlyq arterıa jáne oraı janaspa arterıa tolyǵymen jabylǵan. Aldyńǵy qarynsha aralyq arterıanyń tarylýy 96% boldy. Bylaısha aıtqanda, júrektiń qanmen qamtamasyz etilýi 4% ǵana boldy. Mundaı jaǵdaıda ashyq aorta-koronarlyq shýnttaý otasyn jasaý qajet. Sondyqtan naýqasty kópbeıindi tekserýdi, Almaty Qalalyq kardıologıalyq ortalyq mamandarymen keńeıtilgen konsılıým uıymdastyrdyq. Naýqasty ashyq ota jasaý úshin basqa aýrýhanaǵa aýystyrý kerek dep sheshildi. Biraq 1-1,5 saǵat ishinde naýqasta aıqyn júrek jetkiliksizdigi paıda bolyp, ony basqa aýrýhanaǵa jetkizý úlken qaýip týǵyzdy. Aldyńǵy qarynshaae aralyq arterıaǵa stent qoıýdan basqa amal bolmady. Stentteý sátti oryndaldy. Qazirgi ýaqytta naýqastyń jaǵdaıy qanaǵattanarlyq, úsh kún jansaqtaý bóliminde jatty», - deıdi №4 qalalyq klınıkalyq aýrýhananyń rentgen-endovaskýlárlyq hırýrgıa jáne kardıologıa bóliminiń meńgerýshisi Asqar Narynbaev.
«Altyn saǵat» prınsıpi boıynsha durys qabyldanǵan sheshimder tizbegi: ushaqty qaıtarý, tasymaldaý kezinde aýrýhanaǵa deıingi kezeńde jedel medısınalyq kómek brıgadasynyń kásibı is-áreketi jáne №4 qalalyq klınıkalyq aýrýhana jaǵdaıynda shuǵyl hırýrgıalyq aralasý arqasynda naýqas aman qaldy.
«Bul jaǵdaıda bort keri qaıtarylmaǵanda, Atyraýǵa ushý ýaqyty úsh saǵat jáne osy úsh saǵat ishinde kez kelgen ýaqytta júrek toqtap, naýqas qaıtýy múmkin edi», - deıdi №4 qalalyq klınıkalyq aýrýhananyń rentgen-endovaskýlárlyq hırýrgıa jáne kardıologıa bóliminiń meńgerýshisi Asqar Narynbaev.
Er adam otadan aıyǵyp, ońaltýdy jalǵastyrady. Jansaqtaý bólimindegi úsh kún jáne kardıologtardyń jiti baqylaýyndaǵy bir apta artta qaldy. 2024 jyldyń 13 tamyzy Jaqsylyq Iǵjanovtyń ekinshi týǵan kúni. Aıtpaqshy ol da ushqysh, zeınetkerlikke shyqqansha shaǵyn avıasıada jumys istegen. Komandırdiń ushaqty áýejaıǵa qaıtarý sheshimi arqasynda Jaqsylyq aman qaldy.