Saýd Arabıasyndaǵy qajylyqtan elge oralyp kele jatqan ushaqta pavlodarlyq azamattyń densaýlyǵy kúrt nasharlap, alergıalyq aýrý paıda bolǵan. Ol tumaýǵa qarsy preparatty qabyldap, uıyqtap ketken. Araǵa bir saǵat salyp, bet-aýzy isip oıanǵan.
Bilikti dáriger jaıly DSM saıty jarıalady, dep habarlaıdy aqshamnews.kz.
Bortserik qyz ushaq ishindegi jolaýshylarǵa shuǵyl dáriger qajet ekenin habarlaǵan. Dál sol ýaqytta ushaqta bolǵan Jetisý oblysynyń dárigeri Jannur Syrymov naýqasqa birden alǵashqy kómek kórsetýdi bastap ketken.
Jolaýshy Murat Imanǵazınovtyń aıtýynsha, bul ýaqytta shamamen Qap taýlarynyń ústinde ushyp kele jatqan.
«Ekıpaj shuǵyl jaǵdaı bolsa, ushaqty jaqyn mańdaǵy áýejaıdyń birine qondyramyz degen sheshim qabyldaǵan. Biraq Jannur Máýlenuly óz isiniń kásibı mamany ekenin aıtyp, aman-esen jetkizdi. Ómirime arasha túsken abzal janǵa sheksiz rızashylyǵymdy aıtqym keledi», - deıdi Murat Imanǵazınov.
Jannur Syrymov búginde Jetisý oblysy, Kóksý aýdandyq aýrýhanasynyń bas dárigeri bolyp qyzmet atqarady. Sol saparynda Mekkege múgedek ákesin qajylyqqa aparyp, qaıtyp kele jatqan beti eken.
«Naýqasqa ómirimde áýede medsınalyq kómek kórsetem degen oı bolmapty. Ákeme únemi em-dom jasap júretindikten, janymda dári-dármek qobdıshasyn ustaıtynmyn. Bortserik qyzdyń habarlaýynan soń naýqas aǵanyń janyna jedel baryp qarasam, kóziniń aınalasy men beti isine bastaǵan. Muny medısına tilinde «Kvınke isinýi» dep ataıdy. Eger 15-20 mınýt ishinde adamǵa medısınalyq kómek kórsetilmese, ólip ketýi yqtımal. Birden «Allergopress» jáne «Prednızolon» preparattaryn ektim. Odan soń qan qysymyn ólshep, tiliniń astyna tabletka saldym. Sıstema salýdy da bastap kettim», - dedi Jannur Syrymov.
Jannur Maýlenuly medısına salasyndaǵy alǵashqy qyzmetin sanıtarlyq feldsher bolyp bastaǵan. Kóksý aýdanyndaǵy qyzmetine deıin Almatydaǵy Syzǵanov atyndaǵy ulttyq ǵylymı hırýrgıa ortalyǵynda búırek transplantologıasy, ýrologıa jáne ekstrakorporaldy detoksıkasıa bólimshesiniń meńgerýshisi, Taldyqorǵan qalasynda aýrýhana basshysynyń orynbasary bolyp eńbek etken.