Almaty qalasynda Uly Otan soǵysynyń ardageri jáne tanymal ǵalym Zulharnaı Seıitov 102 jasqa tolǵan mereıtoıyn atap ótti.
Zulharnaı Seıitov 1922 jyldyń 27 jeltoqsanynda Omby oblysynyń Jańa Kıpchak aýylynda dúnıege kelgen. 1942 jyly Qyzyl Armıa qataryna shaqyrylyp, Uly Otan soǵysynda Stalıngradtan bastap Belarýs, Polsha arqyly ótip, Berlındi shabýyldaý jáne Potsdam saraıyn mınadan tazartý operasıalaryna qatysty. Erligi úshin ol Qyzyl Juldyz ordenimen jáne «Erligi úshin» medalimen marapattaldy.
Soǵystan keıin Zulharnaı Seıitov Otanyna qyzmetin jalǵastyryp, Omby aýylsharýashylyq ınstıtýtyn aıaqtady. Keıin Qazaqstanǵa kóship kelip, ózin ǵylymǵa arnady. Bıologıa ǵylymdarynyń doktory, Respýblıkalyq Ǵylym akademıasynyń akademıgi, Qazaqstan-Reseı medısınalyq ýnıversıtetiniń molekýlalyq bıologıa kafedrasynyń profesory Zulharnaı Seıitov 150-den astam ǵylymı jumys pen monografıanyń, 10 oqý quralynyń, 14 patent pen 8 avtorlyq kýáliktiń avtory atandy. Onyń zertteýleri medısına men azyq-túlik ónerkásibiniń damýyna úlken úles qosty.
Zulharnaı Seıitov – erlik pen ǵylymǵa adaldyqtyń, Otanyna degen súıispenshiliktiń jarqyn úlgisi.
– Onyń ómiri – bizdiń urpaq úshin ańyz, jastar úshin shabyt kózi jáne otansúıgishtiktiń óshpes úlgisi, – dep atap ótti Almaty garnızonynyń baspasóz qyzmeti.
Mereıtoı kúni aqsaqaldy Almaly aýdanynyń Qorǵanys isteri jónindegi basqarmasynyń áskerı qyzmetshileri men Radıoelektronıka jáne baılanys áskerı-ınjenerlik ınstıtýtynyń kýrsanttary quttyqtady. Olar ardagerge zor densaýlyq, uzaq ǵumyr jáne amandyq tiledi.