Soǵys ardagerleri men búginginiń batyrlary týraly jańa kitap shyqty
İshki ister mınıstrliginiń murajaıynda «Uly dala batyrlary» dep atalatyn jańa kitaptyń tusaýy kesildi. Ol ekinshi dúnıejúzilik soǵysta erlik kórsetken maıdangerler men búgingi beıbit zamannyń batyrlaryna arnalǵan, dep habarlaıdy Almaty-akshamy.kz Polisia.kz saıtyna silteme jasap.
Anyqtamalyq-ensıklopedıalyq jınaq «İshki ister organdary men Ulttyq ulannyń qazaqstandyq ardagerler uıymy» Qoǵamdyq birlestiginiń bastamasymen, sonymen qatar ishki ister mınıstri Marat Ahmetjanovtyń qoldaýymen jaryqqa shyqty. Sharaǵa áıgili ǵaryshker, Halyq qaharmany Toqtar Áýbákirov pen burynǵy ishki ister mınıstri, Halyq qaharmany Qaıyrbek Súleımenov qatysty.
«Bul – kelesi urpaqqa zor ónege. Osyndaı erliktiń arqasynda, osyndaı azamattardyń arqasynda egemendikti alyp, búgin úlken bir jarqyn memleket bolyp, damyp jatyrmyz. Men óz atymnan, sondaı-aq áriptesterimniń atynan soǵys ardagerlerine, Halyq qaharmandaryna taǵzym etip, osyny bastaǵan úlken ujymǵa alǵysymdy bildirgim keledi», - dedi mınıstr Marat Ahmetjanov.
Halqymyzǵa beıbit kúnderdi syılaǵan batyrlardyń ómirinen syr shertetin kitaptyń tusaýyn kesý mártebesi qurmetti qonaqtarǵa berildi.
«Bizdiń Uly dala batyrlaryn umytpaı, eske alyp, tarıhty jınap, kitap shyǵarǵandaryńyzǵa raqmet!» - dedi Toqtar Áýbákirov.
«Mundaı kitaptar birinshi kezekte biz úshin emes, jastarymyz úshin, jeke quram úshin jáne jalpy memleketimizdiń jas býynyna arnalady», - dep atap ótti Halyq qaharmany, general-polkovnık Qaıyrbek Súleımenov.
Shara barysynda İİM ardagerler uıymynyń tóraǵasy Ómirzaq Bolsambekov vedomstvo murajaıyna tarıhı ensıklopedıany syıǵa tartty.