Búldirshin qýanyshynyń sebepkerine aınalǵan 87 jyldyq qazynaly tarıhy bar Almaty Memlekettik qýyrshaq teatry jas jetkinshekterge qazaq halyq ertegisiniń jelisimen sahnalanǵan «Ur, toqpaq!» qoıylymynyń premerasyn usyndy.
Jaqsylyq pen jamandyqtyń, adaldyq pen aramdyqtyń ara-jigin aıqyndaıtyn bul spektáklde ańǵal da sengish, aqkóńil de meıirimdi aqsaqal qoshaqanyn izdep júrip, tuzaqqa túsip qalǵan qazdy qutqaryp qalady. Qarapaıym qazdy emes, tańǵajaıyp danyshpan Qazbaıdy qutqarǵan aqsaqal men kempiri ekeýiniń ómirine sol sátten bastap úlken ózgeris enedi. Qazbaı aqsaqalǵa alǵys retinde «Pis, qazan», «Qus, esek» jáne «Ur, toqpaq» atty erekshe sıqyrly syılyqtar usynǵanymen, jeztyrnaqtar túrli adam keıipine enip, aqsaqaldyń syılyqtaryn tartyp alý maqsatynda josparlar qurady. Degenmen bul tuzaqtarǵa qarsy turyp, aqsaqal óz maqsatyna jetedi.
Ulttyq dástúrmen utymdy bezendirilip, áýezdi ánmen, kóńildi bımen árlengen ertegi kishkentaı kórermenderge qyzyqty kóńil-kúı syılap qana qoımaı, bala sanasynyń damýy men rýhanı, adamgershilik qasıetterin boıyna sińirip, til alǵyshtyqqa, tártiptilikke, shynshyldyq pen úlkenge qurmet kórsetýge úndeıdi.
Qoıylymnyń avtory – belgili qalamger, aqyn, dramatýrg, birqatar bedeldi memlekettik syılyqtardyń laýreaty Qasymhan Begmanov. Spektákldiń sýretshisi – Altynaı Júsipáli. Qoıylymdy mýzykamen kórkemdegender – Baqbergen Baıshyǵash jáne Arshyn Joldasqan. Bul qoıylymdy teatr óneri salasynda esimi belgili, ertegi arqyly balanyń shyǵarmashylyq qabiletin damytý, qoǵamdyq ómirge aralasýy jolynda aıanbaı qyzmet etip júrgen, izdenis eńbeginiń negizinde qazaqy ertegilerdi zamanyna saı etip qýyrshaq teatrynyń qorjynyn tolyqtyryp júrgen rejıser Erkebulan Qabdyl sahnalady.
Qýyrshaq óneriniń san qıly múmkindigin paıdalana otyryp, kishkentaı kórermenderimizge jáne eresekterge de erekshe áser syılaýǵa asyq, jaqsylyqqa jany qumar, ertegiler álemin sezindiretin Almaty Memlekettik qýyrshaq teatry 18 jeltoqsanda barsha kórermen qaýymdy teatrǵa shaqyrady!