11 avtokólik, elıtalyq saǵattar men altyn kesekteri bar.
10 naýryz kúni Ulttyq qaýipsizdik komıtettiń baspasóz qyzmeti osy komıtettiń burynǵy jetekshisi Kárim Másimovtiń úıinen tabylǵan zattardy kórsetti, dep habarlaıdy Almaty-akshamy.kz.
«Ulttyq qaýipsizdik komıteti memleketke opasyzdyq jasaý, bılikti kúshpen basyp alý jáne laýazymdyq mindetterin asyra paıdalaný kúdigi boıynsha Másimov pen basqa da adamdarǵa qatysty qylmystyq isti jalǵastyrýda. Sonymen qatar, tergeý barysynda Másimovtiń is-áreketinde kóptegen sybaılas jemqorlyq belgileri anyqtaldy», - delingen baspasóz qyzmetiniń habarlamasynda.
Mamandardyń aıtýynsha, otandyq bıznes qaýymdastyqtary men sheteldik sýbekt ókilderinen jyljymaıtyn múlik, qymbat syılyqtar, sonyń ishinde mádenı qundylyqtar, eleýli mólsherde aqshalaı qarajat alý faktileri qujattaldy.
Atap aıtqanda, jabyq kelisimsharttardyń biri boıynsha sheteldik memleket ókilderinen Másimovtiń UQK tóraǵasy laýazymynda 2 mln AQSH dollary somasynda para alý faktisi boıynsha tergeý júrgizilýde.
Osy qarajatty Gonkongtan Qazaqstan Ulttyq bankine qaıtarý qamtamasyz etildi.
Sonymen qatar, Másimovtiń Premer-Mınıstr laýazymynda bolýy kezeńinde bıznes-qurylymnyń birinen astanada quny 2,5 mlrd teńge elıtalyq turǵyn úı men jer telimin alý faktisi boıynsha tergeý júrgizilýde.
2022 jylǵy qańtarda Másimovti ustaǵannan keıin osy turǵyn úıde 17,2 mln AQSH dollary mólsherinde qolma-qol aqsha, sondaı-aq kóptegen qundy zattar – elıtalyq saǵattar, altyn kesekteri, antıkvarıat jáne basqalary alyndy.
Budan basqa, bıznes sanattaǵy 11 qymbat avtomashına alyndy.
Múlikterine – Nur-Sultan qalasyndaǵy eki elıtalyq páter, Almaty qalasyndaǵy 2 páter men derbes saraı, sondaı-aq Shýche-Býrabaı shıpajaıy aımaǵy kóliniń jaǵasyndaǵy aýmaǵy 1 ga jer telimine tyıym salyndy.
Másimovtiń jaqyn baılanystarynan 5,1 mln AQSH dollary alynyp, oǵan tyıym salyndy.
«Osymen bir mezgilde Másimov pen onyń aınalasyndaǵylar shetel bankterine zańsyz shyǵarǵan asa iri mólsherdegi aqshalaı qarajatty izdestirý, buǵattaý jáne Qazaqstanǵa qaıtarý boıynsha jumys uıymdastyryldy.Barlyq kórsetilgen faktiler boıynsha qarqyndy jedel tergeý is-sharalary júrgizilýde», - delingen habarlamada.