Sýdyń «qara naryǵyna» qarsy is-sharalar aıasynda Tobyl-Torǵaı baseın ınspeksıasynyń mamandary arnaıy sý paıdalaný ruqsattaryna taldaý jasady.
Nátıjesinde jańa Sý kodeksiniń 53-babynda kórsetilgen qadaǵalaý ókilettigine sáıkes júrgizilgen tekseris barysynda Qostanaı oblysy Rýdnyı qalasyndaǵy bir kásiporynnyń uńǵymadan arnaıy ruqsatsyz sý alyp kelgeni anyqtaldy, - dep habarlaıdy Aqshamnews.kz sala mınıstrligine silteme jasap.
Kásiporynǵa zań buzǵany úshin Ákimshilik quqyq buzýshylyq týraly kodekstiń 141-babynyń 2-bólimi, ıaǵnı «Sýǵa memlekettik menshik quqyǵyn buzý» baby boıynsha 1 671 100 teńge kóleminde aıyppul salyndy. Bul - Tobyl–Torǵaı baseın ınspeksıasy jyl basynan beri salǵan eń iri aıyppul.
2025 jyly ınspeksıa Ákimshilik quqyq buzýshylyq týraly kodekstiń 141-babyn buzǵan bes derek tirkedi. Osy buzýshylyqtar úshin jalpy somasy 2 339 540 teńge aıyppul salyndy. Barlyq zańbuzýshyǵa arnaıy sý paıdalaný ruqsatyn alý jóninde nusqama berilip, tıisti usynystar jasaldy.
«Jańa Sý kodeksine engizilgen qadaǵalaý ókilettikteri baseın ınspeksıalaryna azamattardyń ótinishterine, sý zańnamasyn buzý týraly málimetterge jáne monıtorıń nátıjelerine jedel áreket etýge múmkindik beredi. Inspektorlar oqıǵa ornyna dereý baryp, zańbuzýshylyq rastalǵan jaǵdaıda ákimshilik aıyppul sala alady. Bul zańsyz sý alýǵa jáne sýdyń «qara naryǵyna» qarsy tıimdi kúres júrgizýge jol ashady», – dedi Tobyl-Torǵaı baseın ınspeksıasynyń basshysy Almat Abjanov.