Úndistannyń halyq kóp shoǵyrlanǵan eki shtatynda sońǵy birneshe kúnde kem degende 96 adam qaza tapty. Qazir búkil el aptap ystyqtan zardap shegip otyr. Ýttar-Pradesh pen Bıhar shtattarynda aýa temperatýrasy 45°C-qa deıin kóterildi, dep habarlaıdy Almaty-akshamy.kz.
Ólim-jitim ásirese soltústik Ýttar-Pradesh shtaty men shyǵys Bıhar shtatynda kóp kezdesedi. Bılik osy shtattardaǵy 60 jastan asqan turǵyndarǵa jáne ártúrli aýrýlardan zardap shegetin basqa adamdarǵa kúndiz úıden shyqpaý týraly eskertti, dep jazdy The Guardian.
Ýttar-Pradesh shtatynyń Balıa aýdanynda 54 adam qaıtys boldy. Bılik qaıtys bolǵandardyń kóbiniń jasy 60-tan asqanyn jáne qatty ystyqtan asqynýy múmkin syrqattary bar ekenin anyqtady.
Balıa aýdanynyń medısına qyzmetkeri S.K.Iadav sońǵy úsh kúnde aýdandyq aýrýhanaǵa aptap ystyqtan burynnan bar derti asqynǵan 300-ge jýyq naýqas túskenin aıtty.
Aýyr jaǵdaıǵa baılanysty bılik jedel járdem bólimendegi tósek sanyn kóbeıtti.
Patak esimdi Balıa turǵyny 17 maýsymda ákesinen aıyrylǵan.
«Balıada mundaı jaǵdaı bolǵan emes. Ystyqtan munshalyqty kóp adam qaıtys bolǵandardy kórgen emespin. Adamdar kóshege shyǵýǵa qorqyp otyr. Joldar men bazarlar qańyrap bos qaldy», -deıdi Patak
Jeksenbi kúni Balıa okrýginde eń joǵary temperatýra 43°C boldy. Bul ádettegi normadan 5°C-qa asyp ketti. Aýanyń salystyrmaly ylǵaldylyǵy 25% deńgeıinde bekitildi, bul jylý áserin arttyrdy.