Osy oraıda, baǵdarlamanyń oń tustary men olqylyqtaryna baınalysty sarapshylardyń pikirin bilip, ótinim berip úlgermegen analardyń shaǵymyna qulaq astyq.
"Men búgin "Otbasy bankke" barǵan edim. Saǵat 12:30 da baǵdarlama jabyq dep qaıtaryp jiberdi. Baǵdarlama tańǵy 09.00-de ashylyp, úsh saǵatta qalaı tolyp ketedi? Sonda kimder alyp úlgerdi? Osyny túsinbeı dal boldym. Bankte kezek kútken azamattardyń qarasy óte kóp. Bárimiz qujattarymyzdy tapsyra almaı sandalyp qaldyq", – deıdi qala turǵyny Gaýhar İlásova.
Qarjy sarapshysy Aıbar Oljaevtyń pikirinshe, ıpotekanyń tıimdi tustary jeterlik.
"Meniń oıymsha «Umaı» ıpotekasy tıimdi. Sebebi onyń stavkasy 14%. Al bizde bazalyq stavka - 16,75%. Banktiki orta eseppen 21-22% bolady. Sondyqtan bazalyq stavkadan tómengi kez kelgen ıpoteka tıimdi. Odan bólek ıpotekanyń somasy óte jaqsy 15,6 mlrd teńge. Qysqarǵan, shektelgen lımıt joq. Alǵashqy jarnasy da óte qoljetimdi. Azamattarǵa óte yńǵaıly ıpoteka. Bul ıpotekaǵa suranys joǵary ekenin estip jatyrmyn", – deıdi Aıbar Oljaev.
Turǵyndar sońǵy ýaqytta úkimettik baǵdarlamalarǵa tapsyrý jarys sekildi bolyp ketkenin aıtyp shaǵymdandy.
Bizdiń elimizde 19 mln adam emes, 180 mln adam turatyn sekildi. Halyqtyń basym kópshiliginde úı joq. Aýyldy mekenderde jumys joq. Bári qalaǵa qaraı kóshedi. Almaty qalasynda turyp jatqanymyzǵa 20 jyldan astam ýaqyt ótti. Áli kúnge úı ala almaı júrmiz. Ózim jalǵyzbasty anamyn. Eki birdeı ul tárbıelep otyrymyn. Áli kúnge jaldamaly páterde turyp jatyrmyz. Sońǵy ýaqytta barlyǵy jarys sekildi bolyp ketti. 4%-pen kólik alý 18 sekýndta jabylǵan edi. Endi «Umaı» ıpotekasyna ótinish berip úlgermedik. Balalarymyzdy tegin qosymshaǵa jazý kezinde de saıttan qatelik shyǵyp, kelesi kúni balalardyń tolyp ketekeni jaıly habar shyqty. Tıimdi baǵdarlamaǵa qatysý úshin bárimiz jantalasýymyz qajet sekildi, – deıdi Baqyt Turǵynbaı esimdi qala turǵyny.
Atalǵan jaǵdaıdyń mán-jaıyn surap «Otbasy banktiń» bólimshesine habarlastyq.
"Ótinishter onlaın jáne oflaın qabyldandy. Azamattar kezekpen turyp, qujattaryn tapsyrdy. 15,6 mlrd qarjy ıgerilgendikten, baǵdarlama jabyldy. Aldaǵy ýaqytta qansha adamnyń qujaty qabyldanǵany jaıly aqparat shyǵady, – dep habarlady «Otbasy bankte».