D.Qonaevtyń 111 jyldyǵy atalyp ótti.
Megapolıste memleket jáne qoǵam qaıratkeri, úsh márte Sosıalısik Eńbek Eri, dıplomat, akademık Dinmuhamed Ahmetuly Qonaevtyń eskertkishine gúl shoqtaryn qoıý rásimi ótti. Sondaı-aq, D.A.Qonaevtyń memorıaldy páter-mýzeıinde ekskýrsıa uıymdastyryldy. Zıaly qaýym ókilderi memleket jáne qoǵam qaıratkeriniń ómiri men memlekettik qyzmeti, onyń elimizdiń áleýmettik-ekonomıkalyq, ǵylymı áleýetin damytýǵa qosqan úlesi, keıbir saıası jáne quqyqtyq kózqarastary, saıası talanty týraly estelikterimen bólisti.
«Men D.A.Qonaevpen birge jumys jasaǵan baqytty adamdardyń birimin. Zeınetke shyqqan kezinde aǵamyzben etene aralastym. Ol kisiniń adamgershiligi men eńbekqorlyǵyna qarap qaı kezde bolsyn tamsanatyn edik. Zeınet jasyna shyqsa da, eline eńbek etip, bolashaq urpaqqa óshpes iz qaldyrǵan bolatyn. Ol kisiniń jarqyn beınesi, qajymas qaıraty urpaq jadynda máńgi saqtalaryna senimdimiz. Búgin mine jastar da is-sharaǵa qatysyp, ózderiniń júrekjardy tilekterin arnaýda. D.A.Qonaev el úshin ólsheýsiz eńbek etken eren tulǵa desek, artyq aıtpaǵanymyz bolar», – deıdi Qazaqstan Jýrnalısıka akademıasynyń vıse-prezıdenti Valerıı Jandaýletov.
Memleket qaıratkeriniń 111 jyldyǵyna arnalǵan is-sharanyń maqsaty – onyń el ekonomıkasy men saıası arenadaǵy rólin urpaqtan-urpaqqa nasıhattaý jáne dáripteý. Onyń ómiri men kóp qyrly qyzmeti Qazaqstannyń uly dáýiriniń sımvolyna aınaldy.
«Biz jas bolsaq ta, D.A.Qonaevtyń ultyna jasaǵan qyzmetinen habarymyz bar. Búgin grýppalastarymmen birge gúl shoqtaryn qoıyp, rýhyna taǵzym etip, murajaı-úıin aralap shyqtyq. Bizge óte qatty unady. Atamyzdyń oqyǵan kitaptaryn, demalǵan oryndyǵyn, asqanasyn kórip qaıttyq. Birge 30 jyldaı qyzmettes bolǵan adamdardyń áńgimelerin estip, biz de jadyrap qaldyq. Bolashaqta atamyz sekildi elge eńbegi sińgen azamat bolsaq degen armanym bar», – deıdi QR Ulttyq qaýipsizdik komıtetiniń Shekara akademıasynyń 4 kýrs kýrsanty, serjant Ádilbek Qaparov.
Qonaevtyń shynaıy tulǵasyn ashýǵa, ıaǵnı ony qarapaıym tulǵa retinde kórsetýge murajaı úıi úlken múmkindik beredi. Bul oryn Qonaevty tek memleket qaıratkeri retinde ǵana emes, shynaıy ómirde bolǵan tulǵa retinde de ashyp kórsetti desek, artyq aıtpaǵanymyz bolar.
«Munda saqtalǵan jádigerler Dinmuhamed Ahmetulynyń dúnıe-múlikke qyzyqpaıtyn qarapaıym adam bolǵanyn, onyń qarapaıym tirshiligin, qalaı dem alyp, nendeı dúnıege qyzyǵýshylyq bildiretinin ańǵartady. Murajaı bul ótken tarıhymyzben tanystyratyn oryn ári ónegeli ómirdiń naǵyz kýágeri», – deıdi murajaı meńgerýshisi Elena Kýbasheva.
Atalmysh is-sharaǵa D.A.Qonaevtyń qyzmettes izbasarlary, memleket jáne qoǵam qaıratkerleri, soǵys jáne eńbek ardagerleri, týǵan-týystary, BAQ ókilderi, qala turǵyndary men qonaqtary qatysty