20-45 jas aralyǵyndaǵy avtorlar qatysady
Aqyn-jazýshylardy, dramatýrgter men balalar avtorlaryn qoldaý maqsatynda «AMANAT» partıasynyń bastamasymen jyl saıynǵy respýblıkalyq «Uly Dala» shyǵarmashylyq baıqaýy bastaldy, dep habarlaıdy Almaty-akshamy.kz BAQ.KZ-ke silteme jasap.
Baıqaý jyl saıyn «Ulttyq mura» partıalyq jobasy aıasynda Qazaqstan Jazýshylar odaǵymen birlesip ótkiziledi. 2019 jyly bastaý alǵan baıqaý osymen tórtinshi ret ótkizilip otyr. Baspasóz máslıhatynda partıa Hatshysy Dáýlet Káribek jýrnalıserge baıqaýǵa qatysýdyń basty erekshelikteri men sharttary týraly egjeı-tegjeıli baıandap berdi.
«Dástúrli túrde uıymdastyrylyp kele jatqan «Uly Dala» baıqaýynyń basty maqsaty – ulttyq jáne rýhanı qundylyqtardy pash etetin búgingi otandyq avtorlardyń shyǵarmalaryn qoldaý jáne nasıhattaý. Bıyl qatysýshylar shyǵarmashylyq sheberligin tórt nomınasıa boıynsha synap kóredi: «Proza», «Poezıa», «Dramatýrgıa» jáne «Balalarǵa arnalǵan shyǵarma». Negizgi nomınasıalardan bólek, baıqaý aıasynda arnaıy syılyqtar da qarastyrylǵan. Sondaı-aq qatysýshylardyń barlyq shyǵarmalary BAQ-ta jarıalanatyn bolady», – dedi partıa hatshysy Dáýlet Káribek.
Spıkerdiń aıtýynsha, bıyl Ahmet Baıtursynulynyń 150 jyldyǵyna, Muhtar Áýezovtiń 125 jyldyǵyna oraı arnaıy syılyqtar taǵaıyndalyp otyr. Sonymen qatar, «Alash amanaty» arnaıy syılyǵy tabystalady.
QR Memlekettik syılyǵynyń laýreaty Roza Muqanova qazirgi qazaq ádebıetine, sonyń ishinde jas qalamgerlerge qomaqty qoldaý qajet ekenin alǵa tartyp otyr.
«Ádebıet – qoldaýǵa zárý. Ásirese, ádebıetke kelgen jastar qaýymyn qoldaý qajet. Al osyndaı konkýrstar talantty jastardyń ádebıet álemindegi betalysyn aıqyndap, shyǵarmashylyǵyn oqyrmanǵa tanystyrady», – dedi jazýshy-dramatýrg Roza Muqanova.
Qazaqstannyń eńbek sińirgen qaıratkeri Amanjol Áltaıdyń aıtýynsha, búgingi qoǵamdy kórkem ádebıet aıryqsha oryn alady.
«Uly Dala» shyǵarmashylyq baıqaýy – AMANAT partıasynyń aldaǵy ýaqytta júıeli túrde ulttyń mádenıeti men ónerine qamqorshy bolatyndyǵynyń naqty bir dáleli. Hakim Abaı aıtqandaı, aqyly nurly, júregi jyly, qaıraty ystyq tolyq adam qalyptasýy úshin mindetti túrde kórkem ádebıettiń ýyzyn emip ósýi kerek», – dedi Májilis depýtaty Amanjol Áltaı.
Qazaqstannyń eńbek sińirgen qaıratkeri Janarbek Áshimjan mundaı is-shara jas qalamgerlerdi yntalandyryp, shyǵarmashylyǵyna tyń serpin beretinin jetkizdi.
«Uly Dala» baıqaýy – mádenıet, rýhanıat, ádebıet baǵytyndaǵy elimizdegi eń iri jobalardyń biri. Qazirgi kezde proza, dramatýrgıa, poezıa janrlarynda qalam tartyp júrgen asa talantty jastar bar. Al mundaı baıqaýlar – jastar qaýymyna shalqar shabyt syılap, jańa shyǵarmalar jazýǵa yntalandyrady», – dedi Májilis depýtaty Janarbek Áshimjan.
Partıa Hatshysy Dáýlet Káribek baıqaýǵa kelip túsken barlyq shyǵarma kóziqaraqty oqyrmannyń nazaryna kúndelikti usynylyp, ashyq jarıalanyp otyratynyn aıtty.
«Qatysýshylarǵa qoıylatyn barlyq talaptar men baıqaý barysy belgilengen ereje mátini búgin BAQ-ta, áleýmettik jelilerdegi paraqshalarymyzda jáne partıanyń resmı saıtynda jarıalanady. Erejege saı kelip túsken shyǵarmalardy búrkenshik esimmen aikyn.kz saıtynan arnaıy ashylǵan «Uly dala» baıqaýy aıdarynda kúndelikti jarıalap otyratyn bolamyz. Kez kelgen qyzyǵýshylyq tanytqan adam sol jerden shyǵarmalarmen tanysa alady», – dep atap ótti partıa Hatshysy Dáýlet Káribek.
Aıta ketý kerek, baıqaýǵa 20-45 jas aralyǵyndaǵy avtorlar qatysa alady. Qatysýshylar 26 tamyz ben 10 qazan aralyǵynda irikteledi. Baıqaý nátıjesi 25 qazan – Respýblıka kúni qarsańynda qorytyndylanyp, saltanatty is-sharada jarıalanady.