Bul synaq jylyna eki ret qysqy jáne jazǵy oqý kezeńin qorytyndylaý kezinde qaıtalanyp otyrady. Áskerıler jyl boıyna túrli oqý-jattyǵýlarǵa qatysady, polıgondarda dalalyq shyǵý kezinde áskerı mashyqtaryn shyńdap, deneshynyqtyrýmen úzbeı aınalysady. Sonymen qatar komandalyq-shtabtyq jattyǵýlar, áskerı oıyndar ótkizilip, ár áskerı qyzmetshi jeke ádistemelik tapsyrmalar oryndaıdy.
Negizgi maqsaty - jeke quramnyń mashyǵyn, vzvodtardyń, rotalardyń, quramalar men bólimder batalóndary basqarmalarynyń shynaıy deńgeıin, bólimshelerdiń qysqa merzimde qoıǵan jaýyngerlik tapsyrmalardy oryndaýǵa ázirlikterin tekserý. Sondaı-aq oqý-jaýyngerlik tapsyrmalardy pysyqtaý, jaýyngerlik daıarlyq josparlary men baǵdarlamalaryn oryndaý barysynda bólimsheler men olardyń basqarý organdarynyń jaýyngerlik daıarlyǵy men úılesimdiliginiń deńgeıin baǵalaý.
Kez kelgen oqý ornyndaǵy sıaqty, oqý kezeńiniń sońynda synaq qabyldanady. Áskerı qyzmetshiler úshin bul emtıhan – qorytyndy tekserý. Kim qandaı jetistikke qol jetkizdi, kim neni úırendi – osynyń bári synaq kezinde anyqtalady.
Shyrt uıqyda jatqan jeke quram tań qylaý bere dabylmen turǵyzylyp, jaýyngerlik ázirlik boıynsha oqý-jattyǵýǵa kirisip ketti. Budan basqa áskerılerdiń aldynda saptyq daıyndyq, atý daıyndyǵy, dene daıyndyǵy, jalpy áskerı Jarǵylar, memlekettik-quqyqtyq daıyndyq jáne basqa pánderden synaqtar kútip tur. Árbir sarbaz, serjant, ofıser bul synaqtyń salmaǵyn sezinip, úlken jaýapkershilikpen qaraýda. Ofıserler quramynyń kásibı daıyndyǵyna da aıryqsha nazar aýdarylmaq.
Synaq nátıjesi boıynsha ár áskerı qyzmetshige jeke-jeke baǵa qoıylyp, sodan áskerı bólimderge jalpy baǵa shyǵarylady.
“Jalpy, áskerılerdiń daıyndyǵy jaman emes. Olar byltyrǵy kúzde attestasıadan ótip, kásibı biliktilikteri men daıyndyqtaryn dáleldep shyqqan bolatyn. Budan keıin qaıtadan jańa oqý kezeńi bastalady. Áskerılerdiń oqýy úzilissiz jalǵasa beredi. Bul oqýda kanıkýl degen uǵym joq. Únemi jaýyngerlik ázirlikte bolýdyń talaby – osy. Jaýyngerlik daıyndyqtyń sapasy neǵurlym joǵary bolsa, soǵurlym jaýyngerlik ázirlik joǵary bolmaq. Biz, Ulttyq ulan aǵa býynynyń úzdik dástúrleri negizinde tárbıelengen «Ońtústik» óńirlik qolbasshylyǵynyń jeke quramy qorytyndy tekserýdi abyroımen tapsyryp, senimdi aqtap shyǵaryna senimdimiz”, - deıdi podpolkovnık Baqyt ÁLİPBAEV.
