Búgin komısıa áskerı mekemedegi arnaıy kólikterdiń jaramdylyǵyn tekserdi
Qańtar oqıǵasynda qatty zardap shekken Ulttyq ulannyń 30-dan asa tehnıkasy qaıta jasaqtaldy. Búgin komısıa áskerı mekemedegi arnaıy kólikterdiń jaramdylyǵyn tekserdi, dep habarlaıdy Almaty-akshamy.kz Almaty.tv-ge silteme jasap.
Aıta keteıik, jyl basyndaǵy dúrbeleń kezinde Ulttyq ulannyń eki kóligi tolyq órtenip ketken edi.
Jyraqta júretin jaýyngerler úshin radıobaılanys múltiksiz jumys isteýi tıis. Sondyqtan búgingi tekseris jeliniń jaı-kúıin baıqaýdan bastaldy. «Ońtústik» óńirlik qolbasshylyǵy bastaǵan komısıa toby Ulttyq Ulannyń 5571 bólimshesiniń áskerı tehnıkasyn túgel tekserip shyqty.
«Joıýǵa bolatyn azdaǵan eskertpeler boldy. Radıojelide baılanys jetkiliksiz ekeni anyqtaldy. Biraq ony birden jóndep, ekıpaj komandırine tapsyrdym», – dedi Baılanys bóliminiń ofıseri Roman Petrov.
Tekseristi tereńirek túsiný úshin bul jumysqa biz de aralasyp kórdik. BTR-den bólek «ÝAZ» markaly avtokólikter men sarbazdardy ári-beri tasý úshin jıi qoldanylatyn áskerı Kamazdar qaraldy.
«Kamaz avtokóligin tekserdik. Jaǵdaıy jaqsy. Asa bir aqaý anyqtalǵan joq. Biraq tazalanbaǵan jerleri bolady endi. Ony júrgizýshige qosymsha aıtyp otyramyz», – dedi QR Ulttyq ulany «Ońtústik» óńirlik qolbasshylyǵy áskerı polısıa bóliminiń ofıseri Erkebulan Sharyqbaev.
Eske salsaq, kólikterdiń dál osy eki túri qańtar oqıǵasynda túgi qalmaı janyp ketken edi. İsten shyqqan eki mashınamen qatar myna qaz-qatar tizilgen arnaıy kólikterdiń teń jartysy, ıaǵnı qyryqqa jýyǵy dúrbeleńge jumyldyrylǵan. Beıbereket kezinde mashınalardyń kóbine zaqym kelip, áınekteri synǵan bolatyn.
«Qalǵan avtokólikter búgin sapta, jóndeýli kúıde tur. Ol tehnıkanyń jaǵdaıy, qarý-jaraqtar tekserilip jatqan arnaıy avtokólikter bar. Sonyń barlyǵy jaqsy baǵa alyp jatyr búgin», – dedi QR Ulttyq ulany «Ońtústik» óńirlik qolbasshylyǵy 5571 áskerı bólimi komandıriniń tehnıka jáne qarý-jaraq jónindegi orynbasary Mereı Qonysbaev.
Sondaı kólikterdiń birinde bolyp, aıaǵynan jaraqat alǵan Mereı Qonysbaev erligi úshin bıyl «İİ dárejeli Aıbyn» ordenimen marapattalǵan. Ol jaýyngerlerdiń tehnıkalyq jasaqtalýy túrli áskerı operasıalar kezinde úlken mańyzǵa ıe bolady deıdi. Jalpy Almatydaǵy Ulttyq ulanǵa 100-den asa áskerı tehnıka tıeseli. Arnaıy avokólikter sońǵy ret 2019 jyly jańartylypty. Qyzmettegi kólikter 10 jyldan keıin esepten shyǵarylady.