Búgin Prezıdent lýdomanıaǵa qarsy kúreske qatysty zań aktilerine túzetý engizý týraly qujatqa qol qoıdy. Bul – Ulttyq quryltaıda kóterilgen bastamalardy júzege asyrý aıasynda qabyldanǵan besinshi zań.
Memleket basshysy Atyraýda sóılegen sózinde lýdomanıany áleýmettik keseldiń biri dep atap ótti jáne tıisti normatıvtik qujatty Parlamenttiń qazirgi sesıasynyń sońyna deıin qabyldaýdy tapsyrdy.
Zań jobasy túrli pikirtalas alańynda talqylanyp, oǵan depýtattar, Ulttyq quryltaıdyń jáne Jastar jónindegi keńestiń músheleri qatysty. Mamyr aıynda zańsyz oıyn bıznesi men lýdomanıaǵa qarsy is-qımyl jónindegi keshendi jospar bekitilip, onyń erejeleri jańa zańnyń normalarymen úılesim tapty.
Parlament depýtattarynyń usynysymen qabyldanǵan bul qujatta qumar oıyndaryn oınaýǵa ruqsat berilgen adamdardyń sanyn azaıtýdy kózdeıtin júıeli is-sharalardyń birtutas kesheni qarastyrylǵan. Sondaı-aq memlekettik qyzmetshilerdiń qumar oıyndarǵa qatysýyna tyıym salynǵan.
Osy qujatta kózdelgen negizgi jańalyqtyń biri – Boryshkerlerdiń biryńǵaı tizimindegi azamattarǵa qatysty shekteý sharalarynyń engizilýi. Bul – 3,5 mıllıonnan astam adam.
Býkmeker kontoralary men totalızatorlardyń barlyq jerdegi syrtqy jarnamasyna tyıym salynady. Budan bylaı baılanys operatorlary uıaly telefonǵa jarnamasy bar mátindik habarlamany jibere almaıdy.
Sonymen qatar lısenzıasy joq sheteldiń býkmekerlik kontoralarynyń, totalızatorlarynyń ınternet resýrstaryna jáne onlaın-kazınolarǵa tolyq tyıym salynady.
Lýdomanıaǵa shaldyqqan azamattardy saýyqtyrýǵa qatysty birqatar shara qarastyrylǵan. Qumar oıyndarǵa táýeldi adamdardy medısınalyq ońaltýdyń tártibi belgilendi. Mundaı adamdardy, qupıalylyqty saqtaı otyryp, aqyl-keńes berý arqyly baqylaýǵa alý tásili engizildi.