Bul týraly Qazaqstan Ádilet mınıstri Azamat Esqaraev málimdedi.
"Ulttyq qor – balalarǵa" jobasy aıasynda ár balaǵa shamamen 1,5 mıllıon teńge tólenetin bolady, dep habarlaıdy Almaty-akshamy.kz
Ol balalardyń 18 jasqa tolǵannan keıin tólem ala alatynyn eske saldy. Barlyq jańa týǵan balalar men 18 jasqa tolmaǵandar týraly málimetter bazasy Ádilet mınıstrliginde saqtalady.
"Jalpy 18 jasqa deıin Ulttyq qordan ár balaǵa bir jarym mıllıon teńge tólenetin bolady. Meniń oıymsha, bul prezıdenttiń úlken qadamy, bul kóptegen otbasylar úshin úlken qoldaý", - dedi ol.
Eske salaıyq, Parlament Májilisiniń depýtattary "Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Ulttyq qorynan balalarǵa tólemder máseleleri boıynsha ózgerister men tolyqtyrýlar engizý týraly" zań jobasyn jumysqa qabyldaǵany habarlanǵan bolatyn.
"Bul zań jobasy 2024 jyldyń 1 qańtarynan bastap Memleket basshysynyń "Ulttyq qor – balalarǵa" jobasyn iske qosý maqsatynda ázirlendi. Ulttyq qordyń jyl saıynǵy ınvestısıalyq tabysynyń 50% - y balalardyń arnaıy jınaqtaý shottarynda turady. Zań jobasynyń negizgi maqsaty - Qazaqstan Respýblıkasynyń azamattarynyń kámeletke tolǵan kezde deıin turǵyn úı jaǵdaıyn jaqsartý nemese jınaq esebinen bilim alý múmkindigin týdyrý arqyly jas urpaqty qoldaý", - dep túsindirdi depýtat Mádı Taqıev Májilistiń jalpy otyrysynda.
Sonymen qatar, onyń aıtýynsha, memleketke qaıtarylǵan aktıvterdi jınaqtaý jáne basqarý máseleleri boıynsha arnaıy memlekettik qor men Basqarýshy kompanıa qurylatyn bolady.