"Ulttyq qor - balalarǵa" baǵdarlamasy boıynsha BJZQ-ǵa alǵashqy nysanaly talaptar (18 jasqa deıingi balalarǵa) eseptelinip, nysanaly jınaqtaý shottaryna alǵashqy nysanaly jınaqtar (2024 jyly 18 jasqa tolatyn balalarǵa) tústi.
2024 jyldyń 1 qańtarynan bastap baǵdarlamaǵa 2023 jyldyń sońyndaǵy jaǵdaı boıynsha kámeletke tolmaǵan, Qazaqstan azamaty bolyp esepteletin barlyq balalar qatysýshy retinde tirkeldi, dep habarlaıdy almaty-akshamy.kz.
Baǵdarlamaǵa qatysýshylardyń jalpy sany - 6 919 131 bala (qosa alǵanda, 01.01.2006j. bastap 31.12.2023j. deıin týylǵan balalar). Onyń ishinde 304 815 qatysýshy 2024 jyly 18 jasqa tolady (qosa alǵanda, 01.01.2006j. bastap 31.12.2006j. deıin týylǵan balalar).
Olardyń barlyǵyna ótken jyl úshin Qazaqstannyń Ulttyq qorynan 100 AQSH dollary jáne 52 senti mólsherinde birdeı soma esepteldi.
Bul tek alǵashqy esepteýler ekenin túsiný mańyzdy!!! Jyl saıyn bul soma Ulttyq qor aktıvteriniń ósýi jáne ınvestısıalyq kiris alý esebinen ulǵaıyp otyrady. Budan bólek, eseptelgen qarajat Ulttyq qordyń valútalyq aktıvteriniń quramynda ınvestısıalanýyn jalǵastyrady jáne Baǵdarlamaǵa qatysýshy balalarǵa olar 18 jasqa tolǵanǵa deıin qosymsha ınvestısıalyq kiris ákeledi.
18 jasqa 2024 jyly tolatyn balalarǵa atalǵan soma olardyń BJZQ-da avtomatty túrde ashylǵan nysanaly jınaqtaý shottaryna tústi. Baǵdarlamanyń bul qatysýshylary ózderiniń nysanaly jınaqtaryn turǵyn úıge nemese bilim alýǵa kámeletke tolǵannan keıin birden paıdalanýǵa quqyly bolady.
Nysanaly talaptar – bul Qazaqstan Respýblıkasy Úkimetiniń elimizdiń 18 jasqa deıingi azamattary bolyp tabylatyn balalary aldyndaǵy Ulttyq qorda jyl saıynǵy ınvestısıalyq kiristiń 50% esebinen qalyptastyrylatyn mindettemeleri ekenin esterińizge salamyz. Ol sońǵy 18 jylda (esepti jyldyń aldyndaǵy) ortashalanǵan kiristilik mólsherlemesi boıynsha esepteledi. Nysanaly talaptar retinde eskeriletin qarajat bala 18 jasqa tolǵanǵa deıin ınvestısıalanýyn jalǵastyrady jáne olarǵa jyl saıyn qosymsha ınvestısıalyq kiris esepteletin bolady.
Zańǵa sáıkes, nysanaly talaptardy paıdalaný quqyǵy bala 18 jasqa tolǵannan keıin ǵana paıda bolady. Bala 18 jasqa tolǵan jyly jınaqtalǵan nysanaly talaptar somasy BJZQ-da ashylǵan balanyń nysanaly jınaqtaý shotyna turǵyn úıge nemese bilim alýǵa paıdalaný úshin aýdarylady.
BJZQ-da Qazaqstan azamattary bolyp tabylatyn jáne aǵymdaǵy jyly 18 jasqa tolatyn balalardyń nysanaly jınaqtaý shottarynda jınaqtalǵan aqsha nysanaly jınaqtar dep atalady. Osy qarajatty paıdalaný úshin baǵdarlamanyń kámeletke tolǵan qatysýshysy nysanaly jınaqtardy BJZQ-dan AQSH dollarymen aýdarylatyn banktik shot ashyp, ýákiletti operatorlarǵa júgine alady. BJZQ-men kelisim jasasqan jáne "Ulttyq qor - balalar" baǵdarlamasy boıynsha jumys isteıtin ýákiletti operatorlardyń tizimi enpf.kz saıtynda ornalastyrylǵan.
BJZQ "Ulttyq qor – balalarǵa" baǵdarlamasy boıynsha barlyq nysanaly talaptar men nysanaly jınaqtardy (jınaqtalatyn ınvestısıalyq kiristi qosa alǵanda) AQSH dollarymen esepke alýdy júzege asyrady, sondaı-aq, baǵdarlamaǵa qatysýshylar boıynsha aqparat beredi.
Balanyń baǵdarlamaǵa qatysýy týraly jáne eseptelgen nysanaly talaptar týraly aqparatty kámeletke tolmaǵan balanyń ata-anasy (nemese basqa da zańdy ókilderi) arnaıy ashylǵan kids.enpf.kz saıtynda (balanyń JSN boıynsha) teksere alady. Munda siz, sondaı-aq, baǵdarlamanyń sharttarymen, nusqaýlyqpen tanysyp, ózińizdi qyzyqtyrǵan saýaldarǵa jaýap ala alasyz. Ata-analar óz balalary boıynsha eseptelgen qarjy týraly derekterdi egov.kz portalyndaǵy Jeke kabınetinde teksere alady.
Elimizdiń jasy, jynysy, óńirleri bólinisindegi esepteýler boıynsha statısıkalyq esepter enpf.kz saıtynda turaqty túrde ornalastyrylatyn bolady.
Nysanaly talaptarǵa/nysanaly jınaqtaýǵa qatysýshylardyń jynysy men týǵan jyly boıynsha sany:
Sýret: enpf.kz
BJZQ Baǵdarlamaǵa qatysýshy balalardyń tolyq tizimin jyl saıyn "Jeke tulǵalar" memlekettik derekqorynan alynǵan resmı málimetter negizinde qalyptastyratynyn bilgen mańyzdy. Eger bala osy derekqorǵa qosylǵan bolsa, ol avtomatty túrde "Ulttyq qor – balalarǵa" baǵdarlamasynyń qatysýshysy bolady jáne oǵan baǵdarlamaǵa qatysqan barlyq jyldar ishinde nysanaly talaptar men ınvestısıalyq kiris esepteletinine kepildik beriledi.
Eger bala qandaı da bir sebeptermen "Jeke tulǵalar" memlekettik derekqorynda bolmasa jáne osy sebepti baǵdarlamaǵa qatysýshylardyń tizimine engizilmegen bolsa (biraq onyń qatysýshy bolýǵa quqyǵy bolsa), onda nysanaly talaptar kelesi kúntizbelik jyly ótkizip alǵan kezeń (ótkizip alǵan kezeńder) úshin tolyq kólemde (ınvestısıalyq kiristi qosa alǵanda) esepteledi.
Bul jaǵdaıda balalardyń ata-analaryna (zańdy ókilderine) myna derekterdi tekserýge keńes beremiz:
- balada jeke basyn kýálandyratyn qujattyń bolýy (týý týraly kýálik, 16 jastan bastap - Qazaqstan Respýblıkasy azamatynyń jeke kýáligi);
- jeke basyn kýálandyratyn qujatta derektemelerdiń bolýy jáne olardyń durys kórsetilýi: T. A. Á., týǵan kúni, JSN, azamattyǵy;
- egov.kz portalyndaǵy Jeke kabınetinde balalar týraly málimetterdiń bolýy, tirkelýi jáne durystyǵy (osy resýrsta balanyń ata-anasyna bekitilgen balanyń nysanaly talaptary boıynsha egjeı-tegjeıli úzindi kóshirme usynylady).
Eger balada:
- jeke basyn kýálandyratyn qujat, JSN joq bolsa, turǵylyqty jeri boıynsha "Azamattarǵa arnalǵan úkimet" memlekettik korporasıasyna (HQKO) júgingen jón;
- azamattyǵy joq, anyqtalmaǵan nemese ol durys kórsetilmegen bolsa, onda turǵylyqty jeri boıynsha kóshi-qon qyzmetine júginý kerek.
"Jeke tulǵalar" memlekettik derekqoryna qajetti túzetýler engizilgennen keıin balanyń nysanaly talaptary men ınvestısıalyq kirisi ótkizip alǵan kezeńdi eskere otyryp, kelesi jyly tolyq esepteletin bolady.