Ulttyq qor balalarǵa jobasynyń iske qosylǵany sol-aq eken, Egov júıesinde kinárat shyqty, dep habarlaıdy almaty-akshamy.kz.
Buǵan deıin portalǵa jetkinshekterdiń aty-jóni avtomatty túrde kórsetiledi, dep edi. Alaıda otbasylardyń derekterinde qatelik kóp. Tipti bóten balanyń esimi tirkelgen januıa da kezdesedi. Álbette bul kópshiliktiń alańdaýshylyǵyn týdyryp otyr. IT mamandar bolsa, aqsha bar jerde qashanda qaýip bolatynyn eskertedi.
Aısulý 2 balanyń anasy. Tuńǵyshy - 7, kenjesi - 3 jasta. Iaǵnı ulttyq qor balalarǵa jobasyna qatysy bar otbasylardyń biri. Baǵdarlama birinshi qańtardan bastap iske qosylǵanyn estigen soń, jetkinshekteriniń aty-jónin Egov portalynan teksergen eken.
"Qyzyǵy meniń úlken balamnyń aty jóni Egov-ta joq bolyp shyqty. Tek bir balamdiki tur. Nege olaı bolǵanyn ózim de bilmeımin. Mundaı qatelikter aqparattyq júıede kóp kezdesedi. Mysaly damýmed qosymshasynda meniń atyma 2 emes, 3 bala jazylǵan. Iaǵnı meniń qyzym bar dep kórsetilgen. Ol qyz bala Kókshetaý turǵyny eken. Maǵan kúndelikti onyń qandaı em-dom alyp júrgeni jaıly aqparat keledi. Ata-anasy teksermeı me dep tańǵalamyn. Ózim qaıda baryp shaǵymdaný kerektigin bilmeımin", - deıdi 2 balanyń anasy Aısulý Shahmetova.
Derekterde qatelikterdiń bolyp jatqanyn Elektrondy úkimet basshylyǵy da moıyndap otyr. Sondyqtan Egov qosymshasynyń jańa nusqasyn ornatýǵa keńes beredi.
"Sıfrlyq qujattar týraly bólimine kirip, aqparatty tekserýlerińizdi suraımyz. Eger aqparat jalǵan nemese bolmaǵan jaǵdaıda týý týraly aqparatty ózektendirý qyzmetin paıdalanýyńyzǵa bolady. Onda qajet maǵlumattardy toltyryp, týýdy rastaıtyn qujatty bekitýińiz qajet. Tapsyrys AHAJ bóliminiń qyzmetkerlerimen 2-5 kún aralyǵynda óńdeletin bolady", - deıdi Elektrondyq úkimet departamentiniń dırektory Ádı Orazov.
Jalpy Egov-ta mundaı qateliktiń bolyp turatyny jasyryn emes. Máselen eldi dúrliktirgen 42 500 teńgeni alýǵa ótinish bergende de serverdiń aqparatty óńdeýge qaýqary jetpedi. Sol kezde Úkimet muny kıber-shabýylmen baılanystyrýǵa tyrysyp baqty. Endi Ulttyq qor jobasy qosyldy. Biraq munda da kinarat shyqty. İT mamandar serverdi jóndeýge nemese sıfrlyq júıeniń minsiz jumys isteýine eshkim múddeli emes, deıdi. Nemese ádeıi kedergi keltiretin paıdakúnemder bolýy múmkin degen de joramal bar.
"Úlken aqsha bar jerde úlken qaýip bar. Endi osy eń bastysy aqsha urlamaýdyń basy 100 paıyz sıfravızasıa. Al biz qazir 4 jyl boldy 5-6 jyl boldy áli kúnge deıin kórmeı kele jatyrmyz. Mysaly sol sıfravızasıany 2-3 aıdyń ishinde ekinshi deńgeıli banktiń kómegimen 100 paıyz oryndaýǵa bolady. Erteń kim kepildik beredi. Sonyń ishinde mysalǵa óli emes, tiri azamattar bar ma. Eshkim ony teksere almaıdy qazir. Al ony erteń eshkim teksermese, sol azamattardyń ESP-sy men sol aqshany aýdaryp, urlaý 100 paıyz garantıa. Óte keremet múmkindik", - deıdi Halyqaralyq IT mamany Oljas Ábishev.
Ulttyq qor balalarǵa tólemniń qosylǵany keshe ǵana edi. Álden olqylyq shyǵyp, kópshilikke kúdik uıalatty. "Erteń balam 18-ge tolǵanda Toqaevtyń bastamasymen qurylǵan qordan aqsha alady" degen otbasylardyń senimine selkeý túsirdi. Jaýaptylar bolsa, derekterden qate ketse de, ár bala ózine tıesilini alady dep sendirip otyr.