«Alataý» teatry eldi-mekenderdegi myńdaǵan kórermenmen qaýyshty
Qazaqtyń dástúrli ónerin jańǵyrtyp, keń kólemde nasıhattaýdy maqsat etken «Alataý» dástúrli óner teatry elimizdiń birneshe óńirinde gastróldik saparǵa shyǵyp, kórermenniń ystyq yqylasyna bólendi.
Gastról barysynda teatr Almaty men Jetisý oblystarynyń 16 eldi mekenin aralap, onda 8 myńǵa jýyq kórermendi qamtydy. Almaty oblysyndaǵy Narynqol, Kegen, Shonjy, Shelek, Jarkent, Esik, Qonaev, Qaskeleń, Myńbaı, sondaı-aq Jetisýdaǵy Taldyqorǵan, Tekeli, Sarqan, Balpyq bı, Ótenaı, Úshtóbe, Saryózek aýyldarynda óner kórsetti. Teatr ujymy barǵan jerinde qoıylymdar anshlagpen ótip, ulttyq ónerin bıik deńgeıde nasıhattap jatty.
Al, Ońtústik óńirge gastróldik saparyn teatr kıeli Syr óńirinen- Qyzylorda qalasynan bastady. Bul óńirdi tańdaýdyń ózindik tarıhı-mádenı máni bar. Qorqyt, Janqoja, Buqarbaı, Mustafa Shoqaı, Turmaǵambet, Nartaı, Ábdilda, Ábdijámil syndy uly tulǵalardyń izi qalǵan, ónerdiń altyn besigi.
Teatr dırektory Maqsat Nuralıev gastróldik sapardyń basty maqsatyn bylaı dep túsindiredi:
«Teatrymyz qazaq halqynyń dástúrli ónerin saqtap, ony jańǵyrtý jolynda belsendi jumys atqaryp keledi. Biz tek Almaty turǵyndaryna emes, elimizdiń barlyq óńirlerine sapaly qoıylymdar usynyp, ulttyq ónerimizdi keńinen nasıhattaýdy kózdeımiz. Gastróldik sapar barysynda óńirlerdegi teatrlarmen yntymaqtastyq ornatyp, bolashaqta tyń jobalardyń negizin qalap jatyrmyz», – deıdi ol.
Sapar barysynda teatr «Aıman-SHolpan» mýzykalyq komedıasyn, balalarǵa arnalǵan «Ágýgáı men Igıgáı» qoıylymyn jáne «Altybaqan» án-kúı keshin sahnalady. Kórermender qoıylymnan erekshe áser alyp, halqymyzdyń salt-dástúri men mádenıetine tereń boılaǵan sátterge kýá boldy.
Alda teatr ujymy Shymkent, Túrkistan jáne Jambyl oblystarynyń eldi mekenderinde gastrólderin jalǵastyrady. Jaz mezgilinde gastrólder Shyǵys Qazaqstanǵa – Semeı jáne Óskemen qalalaryna baǵyt alady.
Sonymen qatar, teatr ujymy halyqaralyq deńgeıde de qazaq ónerin nasıhattaýǵa nıetti. Bıyl «Alataý» teatry Máskeýdegi Chehov festıvaline jáne Fransıadaǵy Avınon teatr festıvaline qatysady.
Teatr ujymy gastróldik saparǵa qoldaý bildirgen Almaty, Jetisý, Qyzylorda, Túrkistan, Jambyl oblystarynyń ákimdikterine zor alǵys bildiredi.