Áriptesimiz Bazarbek Atyǵaev – «Qurmet» ordeniniń ıegeri!
Mádenıet – ulttyń rýhanı ózegi, eldiń eńsesin kóterer, rýhyn asqaqtatar bıik qundylyq. Sol kıeli murat jolynda qyzmet etip júrgen sanaýly sańlaqtar bar. Solardyń biri – Bazarbek Qaıyrbekuly Atyǵaev. Jýyrda Memleket basshysy Qasym-Jomart Toqaevtyń qolynan «Qurmet» ordenin alǵan azamat – qazaq mádenıetiniń janashyry ǵana emes, ony júıeli túrde jınaqtap, ǵylymı-tanymdyq negizde nasıhattap júrgen tulǵa.
Rýhanıattyń joǵyn joqtaǵan...
Bazarbek Atyǵaev – qazaq rýhanıatynyń ár salasynda ózindik qoltańbasyn qaldyryp kele jatqan mádenıettanýshy-ǵalym, prodúser-senarıst, fılologıa ǵylymdarynyń kandıdaty, «Almaty» teleradıokompanıasy AQ bas dırektorynyń birinshi orynbasary. Uzaq jyldar boıy ol ulttyq muralardy jınaqtaý, saqtaý jáne urpaqqa jetkizý jolynda tynymsyz eńbek etip keledi.
Memlekettik akademıalyq fılarmonıa dırektorynyń shyǵarmashylyq jónindegi orynbasary qyzmetinde júrgende, el mádenıeti úshin birqatar aıtýly jobalardy júzege asyrdy. Solardyń ishindegi eń aýqymdysy – «Qazaq dalasynyń áýenderi» atty 500 halyq áninen turatyn «Uly Dala sazy» antologıasy. Bul 24 dıskiden turatyn biregeı jınaqta qazaq halqynyń kóne tarıhy men jan dúnıesin sýretteıtin ánder toptastyrylǵan.
Antologıa úshin materıaldar tek Qazaqstan aýmaǵynan ǵana emes, úsh mıllıonǵa jýyq qazaq mekendeıtin Qytaıdyń İle, Tarbaǵataı, Altaı aımaqtary men Mońǵolıanyń Baıan-Ólgeı ólkesinen jınalǵan. Bul eńbek – shekara syrtyndaǵy baýyrlarymyzdyń da rýhanı murasyn urpaq jadyna sińirýge baǵyttalǵan asa mańyzdy joba. «Máńgilik saryn», «Aldaspan» (Batyrlar jyry) jınaqtary osy barystaǵy tabandy eńbekteriniń nátıjesi boldy. Soǵan qosa, Bazarbek Qaıyrbekuly – «Qazaqtyń dástúrli 1000 áni», «Qazaqtyń dástúrli 1000 kúıi» antologıalaryn shyǵarýshylardyń biri. Al etnomýzykalyq ekspedısıa arqyly sheteldegi aǵaıyndar ortasynan joǵalý qaýpinde turǵan 2000-ǵa jýyq kúıimizdi jınap, taspaǵa túsirý – búgingi ult rýhanıaty úshin orasan olja.
Uly Abaı ilimi – urpaqqa baǵdar
Ǵalym retinde de Bazarbek Qaıyrbekuly tyń taqyryptarǵa baryp, qazaq ádebıetin zertteýde jańasha kózqaras usyndy. «Qazaq kórkem aýdarmasynyń bastaýy: Abaı mektebi» atty monografıasy – qazaq ádebıettanýyna qosylǵan súbeli eńbek. Bul eńbekte Abaıdyń aýdarmashylyq dástúrin, kórkem oılaý júıesin, tárjimalyq mektebiniń negizderin tereń taldaǵan. Avtordyń ózi atalǵan eńbekti QR Prezıdenti janyndaǵy Memlekettik basqarý akademıasynyń kitaphanasyna resmı túrde tapsyrdy.
Sonymen qatar, ol Abaı shyǵarmalaryndaǵy adamgershilik, ádildik, bilim men rýhanı damýǵa qatysty mazmundy dárister oqyp, memlekettik qyzmetkerlerge arnalǵan taǵylymdy kezdesýler ótkizdi. Bul – uly oıshyldyń muralaryn búgingi qoǵamǵa beıimdep, ony tárbıelik qundylyq retinde nasıhattaý jolyndaǵy súbeli jumys.
Rýhanı sabaqtastyq jarshysy
Bazarbek Atyǵaevtyń qatysýymen ótken taǵy bir taǵylymdy shara – «Áke men bala: urpaqtar sabaqtastyǵy» atty ǵylymı-tanymdyq kezdesý boldy. Bul basqosý Abaı Qunanbaıulynyń 180 jyldyǵy men kemeńgerdiń uly Turaǵuldyń 150 jyldyǵyna arnaldy. Ol óz baıandamasynda Abaı murasyn jalǵaǵan Turaǵuldyń ádebı-tanymdyq kelbetin ashyp, jastarǵa ónegeli ómir jolyn úlgi etti.Kitap oqý mádenıetin qalyptastyrý, rýhanı sabaqtastyqty nasıhattaý, ulttyq dúnıetanymdy keńeıtý – osyndaı is-sharalar arqyly júzege asyp jatqany anyq. Bul jolda Bazarbek Qaıyrbekuly – el senimine ıe bolǵan zıaly azamat retinde tanylyp otyr.
Ulttyq mádenıetimiz ben rýhanıatymyzdyń ıgiligine sińirgen jankeshti eńbegi úshin berilgen «Qurmet» ordeni – tek marapat emes, bul – áriptesimiz úshin jańa beles, ári úlken jaýapkershilik dep bilemiz.
Ol – búgingi mádenıet maıdanyndaǵy tynysy tereń, bolmysy bekem, ulttyń únin álemge tanytqan qaıratker. Shyǵarmashylyq tabys pen tolaǵaı isterińiz baıandy bolǵaı, rýhanıat janashyry!