«Bul – elimizdiń rýhanı ómirindegi mereıli beles»: Prezıdent Qurmanǵazy atyndaǵy Qazaq ulttyq konservatorıasyn 80 jyldyq mereıtoıymen quttyqtady
Elimizdegi mýzyka salasynyń mamandaryn daıarlaıtyn bilim ordasy óz mereıtoıyn atap ótýde, dep habarlaıdy aqshamnews.kz.
Memleket basshysy Qasym-Jomart Toqaev Qurmanǵazy atyndaǵy Qazaq ulttyq konservatorıasynyń ujymyna quttyqtaý hat joldady. Hatty Qazaqstan Respýblıkasynyń Mádenıet jáne aqparat mınıstri Aıda Balaeva oqyp berdi.
«Bul – elimizdiń rýhanı ómirindegi mereıli beles. İrgeli bilim ordasy osy kezeńde tól mádenıetimizdiń altyn dińgegine aınaldy. Ulttyq mýzykamyzdyń biregeı dástúri bar ustahanasy retinde tanyldy. Qazaqtyń án-kúı ónerin jańa deńgeıge kóterip, onyń ǵylymı negizin qalyptastyrdy. Konservatorıa – daryndy jastarǵa klasıkalyq mýzykanyń qyr-syryn úıretip, kásibı mýzykanttar daıarlaıtyn alǵashqy joǵary oqý orny. Órkenıetimizdiń órisin keńeıtip, ony jer júzine tanytqan kóptegen maıtalman mamandarymyz osy qara shańyraqtan qanat qaqty. Aǵa býyn salǵan sara joldy keıingi urpaq laıyqty jalǵastyryp keledi. Olar elimizdiń shyǵarmashylyq uıymdarynda tabysty eńbek etip júr. Osy oraıda, ulttyq ónerimizdi jan-jaqty dáriptep, rýhanıatymyzdy damytýǵa zor úles qosqany úshin konservatorıa ujymyna shynaıy rızashylyǵymdy bildiremin. Barshańyzǵa shyǵarmashylyq shabyt tileımin! Jumystaryńyz jemisti bolsyn!» – delingen Prezıdenttiń hatynda.
23 qarasha men 3 jeltoqsan aralyǵynda Qurmanǵazy atyndaǵy Qazaq ulttyq konservatorıasynyń 80 jyldyǵyna arnalǵan mereıtoılyq marafon aıasynda konsertter, sheberlik sabaqtar, shyǵarmashylyq kezdesýler, halyqaralyq konferensıa, kórmeler jáne basqa da is-sharalar ótti.
Saltanatty is-sharaǵa elimizdiń mádenı qazynasyna ólsheýsiz úles qosqan óner maıtalmandary qatysty. Olardyń qatarynda Álibek Dinishev, Jámılá Baspaqova, Roza Rymbaeva, Úmitjan Jumaqova, Marám Qojamqulova, Almas Almatov, Serik Erkimbekov, Karıma Saharbaeva, Dúısen Qaseıinov, Altynbek Qorazbaev jáne basqa da óner qaıratkerleri bar.