Memleketke asa iri mólsherde zalal keltirildi
QR Sybaılas jemqorlyqqa qarsy is-qımyl agenttigi Ulttyq mýzeı basshylyǵyna qatysty qylmystyq isti tergep-tekserýdi jalǵastyryp jatyr. Bul týraly atalǵan agenttikten málim etti, dep habarlaıdy Almaty-akshamy.kz.
Búginde Nur-Cultan qalasy boıynsha Cybaılas jemqorlyqqa qarsy qyzmet Ulttyq mýzeı basshylyǵyna jáne basqa da tulǵalarǵa qatysty sotqa deıingi tergeý júrgizip jatyr. Kúdiktilerge 2017-2018 jyldary «Aqparattyq resýrstarda obektilerdi tanymal etý úshin jalpyulttyq tizbege engizilgen obektilerdiń 3D modelin qurý» jobasyn iske asyrý kezinde asa iri mólsherde búdjet qarajatyn jymqyrdy degen aıyp taǵylyp otyr.
«Ulttyq mýzeı merdiger uıymdarǵa atalǵan joba aıasynda atqarylǵan jumystar úshin 1,3 mlrd teńge tólegen.
Bul rette júrgizilgen saraptamalyq zertteý jumystardyń naqty quny 83,4 mln teńgeni quraǵanyn anyqtady.
Osylaısha, jumys quny 1,2 mlrd teńgege negizsiz ulǵaıtylyp, memleketke asa iri mólsherde zalal keltirildi.
Tergep-tekserý amaldary jalǵasýda. Ózge aqparat tergeý múddesine oraı jarıa etýge jatpaıdy», - delingen QR Sybaılas jemqorlyqqa qarsy is-qımyl agenttiginiń habarlamasynda.
Eske salaıyq, bıylǵy mamyr aıynda Ulttyq mýzeı dırektory Arystanbek Muhamedıuly ustalyp, oǵan qatysty «kúzetpen ustaý» bultartpaý sharasy qoldanylǵany málim etildi.
Ol ýaqytta Antıkor qyzmeti QR Ulttyq mýzeıiniń laýazymdy qyzmetkerlerine jáne basqa da tulǵalarǵa búdjet qarajatynyń 146 mln teńge somasyn jymqyrdy degen aıyp taǵylǵany týraly aıtylǵan edi. Bul qarajat «Altyn adamnyń álem mýzeılerine sherýi» halyqaralyq kórmesin ótkizý jónindegi memlekettik satyp alý týraly shart aıasynda qoldy bolǵany málim etildi.