Almaty qalasynyń mektepteri arasynda «Ekologıalyq mádenıetti tárbıeleý – oqýshylarǵa mańyzdy faktor retinde qundylyqty qalyptastyrý»taqyrybynda semınar ótti.
«Almaty – bizdiń ortaq úıimiz» naýqany aıasynda ótken semınar Túrksib aýdanyndaǵy №142 jalpy bilim beretin mektepte uıymdastyryldy. Oǵan 100-den astam mektep dırektory, ádiskerler, dırektordyń tárbıe isi jónindegi orynbasarlary qatysty.
Basty maqsaty – qalalyq ınfraqurylymǵa uqypty qaraý, oqýshylardy joǵary azamattyq jaýapkershilik pen ekologıalyq mádenıetke tárbıeleý, jeke ekologıalyq bastamalardy qoldaý jáne olardy iske asyrý úshin jaǵdaı jasaý.
«Qalalyq semınar «Almaty – bizdiń ortaq úıimiz» aılyǵyna arnalady. Qalalyq ádistemelik ortalyq mamandary, segiz aýdandaǵy mektepterdiń basshylary jáne tárbıe isi jónindegi orynbasarlar qatysyp otyr. İs-sharamyzdyń mańyzdy taqyryby – ekologıa. Bastaýysh synyp muǵalimderi men 5–11-synyp jetekshileri men pán muǵalimderi uıymdastyrdy. Bul qalalyq semınarǵa 100-ge jýyq oqýshy qatysyp, óner kórsetti. Aksıa aıasynda oqýshylardyń qolónerin jınaqtap, kórme uıymdastyrdyq. Almaty qalasy Bilim basqarmasynyń Qalalyq bilim berýdegi jańa tehnologıalardyń ǵylymı-ádistemelik ortalyǵynan jospar boıynsha osyndaı semınardy bizdiń mektepte ótkizý jóninde usynys tústi. Qorshaǵan ortaǵa qamqorlyq jasap, qorǵaý – ár adamnyń azamattyq mindeti dep oılaımyz», – dedi №142 jalpy bilim beretin mektep dırektorynyń mindetin atqarýshy Gúlshat Erbolatqyzy.
«Almaty qalasy mektepterinde túrli ekologıalyq is-sharalar ótip jatyr. Bizdiń mektepte de jalpyqalalyq naýqan sheńberinde semınar ótti. Ulttyq múdde – qoǵamǵa qajetti qundylyq. Naýryzbaı, Alataý, Medeý jáne ózimizdiń Túrksib aýdanynan áriptesterimiz qatysyp, ekologıa men naýqan týraly mol maǵulmat aldy. Oqýshylar, ata-analar jáne ustazdar – osy úshtik odaq atsalysqan aýqymdy shara oıdaǵydaı ótti dep oılaımyn. Týǵan qalamyzdy taza ustaýǵa, ekologıamyzdy qorǵaýǵa úles qossaq degen maqsatymyz boldy. Balaǵa ekologıalyq bilim men tárbıe jaıly uǵymdy ata-anamen qatar, ustaz da túsindire bilýi kerek. Qorshaǵan ortasyn taza ustaǵan oqýshyda jaýapkershilik, adamgershilik jáne izgilik qasıetteri bolady», - dedi №142 jalpy bilim beretin mektep dırektorynyń tárbıe isi jónindegi orynbasary Araı Týhanova.