Elektrondy kitaphanada Ulttyq kitaphananyń 20 myń qujaty bar.
Qoldanystaǵy avtorlyq quqyq týraly zań normalary oqyrmanǵa zamanaýı avtorlardyń shyǵarmalaryn sıfrlyq formatta tolyq oqýǵa múmkindik bermeı otyr. Bul týraly quqyq ıeleriniń respýblıkalyq konferensıasy barysynda QR Ulttyq kitaphanasynyń dırektory Baqytjamal Ospanova aıtty, dep habarlaıdy Almaty-akshamy.kz QazAqparatqa silteme jasap.
«Avtorlyq quqyq máselesi kitaphana jumysyna da qatysty. Ulttyq kitap qoryn saqtaý jáne basylymdardy barynsha qoljetimdi etý – ulttyq kitaphana men respýblıka kitaphanalarynyń basym baǵyttarynyń biri. Kitap qoryn saqtaýdyń bir joly – baspa basylymdaryn sıfrlyq formatqa kóshirý. Osyǵan oraı, «Sıfrly Qazaqstan» memlekettik baǵdarlamasy aıasynda kitaphanada elektrondy kitaphanalardy qalyptastyrý úshin kitap qoryn aýqymdy sıfrlandyrý jumysy júrgizilip jatyr», - dedi QR Ulttyq kitaphana dırektory Baqytjamal Ospanova.
Búgingi tańda 100 myńnan astam otandyq basylym sıfrlyq formatqa kóshirildi. Elektrondy kitaphanada Ulttyq kitaphananyń 20 myń qujaty bar.
Baqytjamal Ospanovanyń aıtýynsha, QR qoldanystaǵy avtorlyq quqyq týraly zańynyń normalary oqyrmanǵa zamanaýı avtorlardyń shyǵarmalaryn sıfrlyq formatta tolyq oqýǵa múmkindik bermeı otyr.
«Kitaphana qyzmetine ár kitapty sıfrlandyrý úshin avtordyń nemese avtorlyq quqyq ıelenýshiniń jazbasha ruqsatyn talap etetin uıymdastyrýshylyq-quqyqtyq jáne qarjylyq sıpattaǵy qosalqy jumystary kedergi keltirýde. Shyǵarmalardy sandyq túrge aýdarýǵa avtordyń kelisiminsiz ol qaıtys bolǵannan keıin 70 jyldan keıin ǵana ruqsat etiledi. Ol ýaqytta bul mańyzdy bolmaı qalýy múmkin. Bir jaǵynan, kitaphanalar shyǵarma avtorlarynyń quqyqtaryn qurmetteýge, ekinshi jaǵynan, olardyń eńbegin paıdalanýshylardyń bilim berý, aǵartý jáne ǵylymı qyzmetine keńinen paıdalanýyn qamtamasyz etýge mindetti. Búgingi tańda biz avtorlarmen 700-ge jýyq kelisimshart jasadyq. Bizdiń oıymyzsha, avtorlyq quqyqty qorǵaý salasyndaǵy ulttyq zańnamada áli de bolsa kitaphanalardyń sıfrlyq ortadaǵy mańyzdy jáne qoǵamdyq aqparatqa qoljetimdilik ortalyqtary retindegi quqyqtaryn kózdeıtin arnaıy bap bolýy kerek. Óıtkeni, Belarýs elinde osyndaı zań qabyldanǵan», - dedi ol.
Óz kezeginde QR Ádilet mınıstrliginiń zıatkerlik menshik quqyǵy departamentiniń dırektory Ermek Altynbekov 2 maýsym kúni "Zıatkerlik menshik týraly" zań qabyldanǵanyn jetkizdi.
«Biz bul zańdy eki jyl talqyladyq. Májiliste 27 jumys toby, Senatta 6 komıtet boldy. Májiliste zań jurtshylyqpen, avtorlyq uıymdar men múddeli memlekettik organdardyń ókilderimen talqylandy. Zań zıatkerlik menshik quqyqtaryn jáne ónerkásiptik menshik obektilerin qorǵaýdy kúsheıtý sharalaryn qarastyrady. Sondaı-aq ulttyq zańnama zıatkerlik menshik quqyqtaryn qorǵaý salasyndaǵy halyqaralyq normalar men tájirıbelerdiń erejelerine sáıkestendirildi», - dedi Ermek Altynbekov.
Sonymen qatar, sharaǵa jınalǵandar zıatkerlik menshik quqyqtaryn is júzinde qoldaný, shyǵarmashylyq qyzmet nátıjelerin jasaý men paıdalanýdy quqyqtyq retteý, sondaı-aq olardyń ekonomıkamen, aqparattyq qoǵammen ózara árekettesýi, sıfrlandyrý, sáýlet, baspa isi jáne taǵy basqa taqyryptar boıynsha aýqymdy máselelerdi qozǵady.
Aıta keteıik, konferensıaǵa kompozıtorlar, oryndaýshylar, fotograftar, jýrnalıser, kınorejısserlar, prodúserler, baspagerler, avtorlyq quqyq ıeleri, Qazaqstannyń bıznes ókilderi qatysty.