Bıyl Ulttyq kıno ortalyǵynyń qoldaýymen 10 jańa fılm prokatqa shyǵyp, kórermenderdi qýantpaq. Bul fılmderde jas urpaqtyń tárbıesine oń yqpal etetin, kórermenge oı salatyn mańyzdy ıdeıalar kórinis tapqan, dep habarlaıdy aqshamnews.kz
Kórermenge usynylatyn fılmderdiń ishinde 2011 jyly Tarazdaǵy teraktide qaza tapqan batyr polıseı Ǵazız Baıtasovqa arnalǵan «Kapıtan Baıtasov» fılmi bar. Sonymen qatar, lýdomanıa taqyrybyn qozǵaıtyn «Igromanka» fılmi qoǵamdaǵy ózekti máselelerdi kóteredi. Al «90+1» kartınasy jastardy salaýatty ómir saltyn ustanýǵa jáne sportqa qyzyǵýshylyq tanytýǵa shabyttandyrady.
Sondaı-aq, «Osennıı brız», «Feıkovyı arman», «Qaitadan», «Tezek», «Qara qyz», «Altyn adam», «Aromatnoe serdse» jáne «Ábil» fılmderi de kınoteatrlarda kórsetiledi.
Ulttyq kıno ortalyǵynyń Basqarma tóraǵasy Qurmanbek Jumaǵalıdiń aıtýynsha, kıno ulttyq ıdeologıany qalyptastyratyn mańyzdy qural bolyp tabylady.
«Memleket qarjysyna túsirilgen kınolarda qoǵamǵa qajetti qundylyqtardy dáripteý basty mindet. Prezıdent Qasym-Jomart Toqaev ta kınoındýstrıany mádenıettiń bir bóligi ǵana emes, ekonomıkanyń jeke tarmaǵy retinde qarastyrýdy tapsyrǵan bolatyn. Osy baǵytta jańa fılmderge erekshe nazar aýdaryldy. Kórermen kóńilinen shyǵady dep senemiz», – dedi Basqarma tóraǵasy.
Sonymen qatar, naýryz aıynyń basynda jańa kınojobalar konkýrsy bastalatyny habarlandy. Bıylǵy basty taqyryptar tiziminde Otanǵa degen súıispenshilik, tarıh pen taǵylym, bilim, otbasy, eńbek adamynyń erligi sekildi mańyzdy máseleler qamtylǵan. Tolyq tizimdi Kıno ortalyǵynyń resmı saıtynan kórýge bolady.
Ótken jyly kınojobalardy irikteý erejesine ózgerister engizilgen bolatyn. Jańa erejelerge sáıkes, konkýrstyń birinshi kezeńinde senarıler qabyldanyp, úzdikteri saraptama keńesiniń qaraýyna jiberiledi. Kınogerlerge senarı jazýǵa shamamen eki aı ýaqyt beriledi.
Bul jańa fılmder ulttyq qundylyqtardy dáriptep, kórermenge taǵylymdy oı salýǵa baǵyttalǵan. Aldaǵy ýaqytta otandyq kınoındýstrıanyń damýyna tyń serpin beretin jobalar kútilýde.