Búgin, 18 naýryz – «Naýryznama onkúndigindegi» Ulttyq kıim kúni. Memlekettik qýyrshaq teatry bul erekshe kúnge oraı jas kórermenderge tartymdy mádenı baǵdarlama usyndy. Halqymyzdyń ulttyq kıimi men dástúrin, qolóneri men mádenıetin nasıhattaýdyń mundaı ádisi kórermenniń kóńilinen shyqty.
Teatr zalynda «Ulttyq kıim – ulttyq mura» atty kórme ashylyp, ulttyq kıim úlgileri, ulttyq naqyshtaǵy qýyrshaqtar men sándik áshekeıler usynyldy. Basty maqsaty jas urpaqtyń ulttyq qundylyqtarǵa qyzyǵýshylyǵyn arttyryp, mádenı muraǵa degen qurmetin joǵarlatýdy kózdeıdi. Balalar halqymyzdyń sándik ónerimen, dástúrli oıý-órnekterimen tanysyp, ulttyq kıimderdiń ereksheligin tamashalady.
«Naýryz qupıasy» – tanymdyq spektákl
Erekshe kórmemen qatar teatr óziniń jas kórermenderine «Naýryz qupıasy» atty qoıylym usyndy. Bul spektákl Qazaqstan Respýblıkasynyń Prezıdenti Qasym-Jomart Toqaev bekitken «Naýryznama» tujyrymdamasy negizinde ázirlengen. Onda mıfologıalyq keıipkerler – Qydyr ata, Kún men Tún, sondaı-aq shyǵys kúntizbesindegi jyl ıeleriniń obrazy somdaldy. Jarqyn obrazdar, qyzyqty sújet pen ınteraktıvti elementter balalar úshin erekshe áserli ári tanymdyq mánge ıe boldy.
Búgingi merekege arnaıy «Jyl, on eki aı» qoıylymyn sahnaladyq. Ár keıipkerdiń ereksheligin ashyp, kórermenge túsinikti ári tartymdy etip jetkizýge tyrystyq. Balalarǵa qyzyqty ári jeńil qabyldanatyn qoıylym ázirledik dep oılaımyn, – deıdi spektákl jaıynda qoıylym rejıseri ári teatr ártisi Shohan Qulnazarov.
Memlekettik qýyrshaq teatrynyń Ulttyq kıim kúnine arnaǵan mádenı sharasy jetkinshek kórermenge halqymyzdyń baı rýhanı álemine tereńirek súńgip, mol áser alýyna múmkindik berdi.
