«Jasyl» ekonomıkany damytý máselelerin talqylandy
Búgin Astanada QR Ulttyq ekonomıka mınıstri Álibek Qýantyrov BUU Bas hatshysynyń kómekshisi, BUU Damý baǵdarlamasy ákimshisiniń kómekshisi jáne BUUDB saıasat jáne baǵdarlamalyq qoldaý búrosynyń dırektory Haolán Shýmen kezdesti, dep habarlaıdy Almaty-akshamy.kz.
İs-sharaǵa QR BUUDB Turaqty ókiliniń m.a. Sýhrob Hodjımatov pen BUUDB departamentiniń dırektory Aınur Baımyrza qatysty.
UEM basshysy qonaqtarǵa iltıpat bildire otyryp, Qazaqstan Birikken Ulttar Uıymymen yntymaqtastyqty joǵary baǵalaıtynyn jáne barlyq mańyzdy máseleler boıynsha ózara is-qımyldy odan ári damytýǵa daıyn ekenin atap ótti.
«Biz BUUDB-nyń 2021-2025 jyldarǵa arnalǵan eldik baǵdarlamasyn qoldaımyz. Ol el damýynyń basym baǵyttaryn qamtıdy. Onyń ishinde áleýmettik máselelerine asa nazar aýdarylady. Baǵdarlama QR-da júrgizilip jatqan aýqymdy saıası jáne ekonomıkalyq reformalar aıasynda ózekti bolyp tabylady», - dedi Á.Qýantyrov.
Sonymen qatar, taraptar Parıj kelisimin ratıfıkasıalaýda jáne ekonomıkany dekarbonızasıalaý boıynsha QR-dyń mańyzdy rólin erekshe atap ótip, «jasyl» ekonomıkany damytý máselelerin talqylady.
«Qazaqstan óz aldyna 2060 jylǵa qaraı kómirtegi beıtaraptyǵyna qol jetkizý boıynsha bıik maqsat qoıdy. Bizdiń el Turaqty damý maqsattaryn iske asyrýdyń ınstıtýsıonaldyq bazasyn qalyptastyrýǵa jáne damytýǵa kóp kóńil bóledi. TDM-ǵa qol jetkizý aıasynda 262 jergilikti ındıkatorlar qarastyrylǵan, olar memlekettik josparlaý júıesimen biriktirilgen. Bul máselede biz eń ozyq tájirıbelerdi qarastyrýǵa jáne bolashaqta osy tájirıbeni qoldanýǵa daıynbyz», - dep habarlady mınıstr.
Sondaı-aq, ol 16-17 maýsymda Almaty qalasynda ótken Ortalyq Azıa elderiniń TDM boıynsha ekinshi Samıtin uıymdastyrǵany úshin BUUDB-ǵa alǵysyn bildirip, «Qazaqstan qatysýshy elderdiń geografıasyn keńeıte otyryp, úshinshi samıtti qabyldaýǵa daıyn»,-dedi mınıstr.
Óz kezeginde Haolán Shý BUU-nyń Qazaqstannyń turaqty damýyna qoldaý kórsetýge daıyndyǵyn rastady.
«BUUDB ekonomıkanyń túrli sektorlarynda birlesken jobalardy iske asyrýǵa múddeli. Ásirese salyq jáne tarıftik saıasat, bilim berý jáne sıfrlandyrý salalarynda. Jalpy, Qazaqstanda Turaqty damý maqsattaryna qol jetkizý boıynsha úlken jumys júrgizilip jatqanyn kórip otyrmyz. Bul salada sizder basqa elderge úlgi bola alasyz», - dedi BUU Bas hatshysynyń kómekshisi.