Ótken aıda teńge 0,14%-ǵa álsiredi.
Qarashada Ulttyq bank valútalyq ıntervensıalar júrgizgen joq, sondaı-aq BJZQ men senimgerlik basqarýdaǵy basqa da qorlardyń zeınetaqy aktıvteri úshin shetel valútasyn satyp alý nemese satý boıynsha operasıalar júrgizbedi, dep habarlaıdy Almaty-akshamy.kz.
Ortalyq bank ókilderiniń málimetine súıensek, qarashanyń qorytyndysy boıynsha, teńge baǵamy 1 AQSH dollary úshin 468,90 teńgege deıin 0,14%-ǵa álsiredi.
«Qazaqstan qor bırjasyndaǵy saýda-sattyqtyń ortasha bir kúndik kólemi bir aıda 121-den 132 mln AQSH dollaryna deıin ulǵaıdy. Saýda-sattyqtyń jalpy kólemi 2,9 mlrd AQSH dollaryn qurady. Munaı baǵasy tómendegenine qaramastan, valúta naryǵy suranys pen usynys turǵysynan, kóbine, "toqsandyq salyq aptasy" faktory esebinen teńgerildi», – delingen QR Ulttyq bankiniń baspasóz qyzmeti habarlamasynda.
Ulttyq banktiń baspasóz qyzmetiniń habarlaýynsha, kvazımemlekettik sektor sýbektileriniń valútalyq túsimin satýy ótken aıdyń ishinde shamamen 500 mln AQSH dollaryna teń boldy. Kvazımemlekettik sektor kompanıalary valúta naryǵynda satýdy ekinshi deńgeıli bankter arqyly derbes júzege asyrady.
«Ulttyq qordan respýblıkalyq búdjetke transfertterdi qamtamasyz etý úshin valútany satý qarashada 70 mln AQSH dollaryna teń boldy. Ulttyq qordan satý úlesi saýda-sattyqtyń jalpy kóleminen 2,4% jáne bir kúnde keminde 10 mln AQSH dollary boldy. Ulttyq Qordyń qarajatymen operasıalar júrgizý kezinde Ulttyq bank naryqtyq beıtaraptyq qaǵıdatyn saqtaıdy, bul shetel valútasyn turaqty jáne birkelki satýdy bildiredi», – delingen Ulttyq banktiń baspasóz qyzmeti málimetinde.
Bank ókilderiniń sózinshe, bul tájirıbe Ulttyq Qor operasıalarynyń valúta naryǵyna áserin barynsha azaıtýǵa múmkindik beredi.