Qazaqstan Ulttyq telearnasy Almatydaǵy jappaı tártipsizdik kezinde órtenip ketken «Altyn qory» týraly túsindirme jasady, dep habarlaıdy Almaty-akshamy.kz telarnanyń baspasóz qyzmetine silteme jasap.
- «Qazaqstan» teleradıokorporasıasy «Altyn qorynyń» bir bóligi Almaty qalasynda jınaqtalǵan. Sebebi qazaq televızıasy men radıosy paıda bolǵaly saqtalǵan qundy materıaldardy óńdeýmen aınalysatyn mamandardyń kóbi Almaty fılıalynda. Oqıǵa kezinde ǵımaratqa úlken zalal kelip, 16 myńǵa jýyq beınetaspa jınaqtalǵan «Altyn qordyń» jerasty qoımalary men sıfrlanǵan vıdeomaterıaldar saqtalǵan Serverler bólmesin órt shaldy. Bul serverde osy kúnge deıin sıfrlanǵan beınematerıaldardyń bir bóligi saqtalǵan (basym bóligi Nur-Sultan qalasynda ) bolatyn. Buǵan qosa, órt sóndirý kezinde qoımalardy sý basty, - delingen habarlamada.
Órtengen serverdiń jady jáne kassetalar men plenkalardyń jaramdylyǵy tolyq tehnıkalyq tekseristen soń aıqyndalady. Sebebi qazirgi kezde qaýiptiligine baılanysty ǵımaratqa kirýge múmkindik joq.
Qordaǵy 110 myńnan astam aýdıomaterıal tolyq sıfrlanǵan. Materıaldardyń sıfrly nusqasy Nur-Sultan qalasyndaǵy bas keńsede saqtaýly. Korporasıa sıfrlandyrý boıynsha keshendi jumystardyń jalǵasy retinde ótken jyldyń sońynda «Altyn qor» jaýharlaryn kópshilikke tanystyryp, kez kelgen elden erkin kórýge múmkindik beretin https://altynqor.com/ arnaıy portalyn ashty. Qazir munda 1500-ge jýyq beıne, 700 aýdıomaterıal bar. Saıtty tolyqtyrý turaqty túrde jalǵasady, - dedi baspasóz qyzmeti.