Ult kósemi ulyqtalýda.
Orys ǵalymy, tarıhshy Vıktor Kozodoı qazaqtyń birtýar uly, Alash ardaqtysy Álıhan Bókeıhan týraly «Dáýir aıasyndaǵy saıası portret» atty kitap jazyp shyqty, dep habarlaıdy Almaty-akshamy.kz. 24.kz-ke silteme jasap.
Qazan aıynda jaryq kóretin monografıaǵa buryn esh jerde jarıalanbaǵan tyń málimetter engen. Myń dana bolyp shyǵarylatyn týyndyny reseılik tarıhshy Qazaqstan Táýelsizdiginiń 30 jyldyǵyna arnaǵanyn aıtady. Kitap iri tarıhı ári saıası qaıratker Álıhan Bókeıhannyń ómir jolyn qamtyǵan.
Vıktor Kozodoı onyń esimi qazaq jurtyna keńinen tanymal bolǵanymen reseılikterdiń bile bermeıtinin aıtady. Osy olqylyqtyń orynyn toltyrý úshin ǵylymı zertteýler júrgizip, qarapaıym tilmen monografıa jazyp shyqtym deıdi ol.
«Bul qoljetimdi janr, ómirbaıan bolǵanymen ǵylymı zertteýlerge negizdelgen. Men Reseı oqyrmandaryn jáne ǵylymı qoǵamdy osyndaı tulǵamen tanystyrýdy maqsat ettim. Ol Qazaqstan úshin de, Reseı úshin de óte mańyzdy rol atqardy. Óz eńbegimde onyń bir eldiń ǵana emes, sol dáýirdegi tutas ımperıalyq, jalpyulttyq deńgeıdegi saıasatker ekenin kórsetemin», - dedi reseılik tarıhshy Vıktor Kozodoı.
Vıktor Kozodoı Álıhan Bókeıhan týraly kitap jazýdy osydan úsh jyl buryn qolǵa alǵan.
Ol kezde tájirıbe almasý maqsatynda Pavlodardyń joǵarǵy oqý oryndarynyń birinde stýdentterge dáris oqypty.