22 tamyzda úkimet otyrysynda QR Energetıka vıse-mınıstri Jandos Nurmaǵanbetov Úlken aýylyndaǵy AES qurylysyna qatysty qoǵamdyq tyńdaýlardyń qorytyndysy boıynsha qandaı sheshim qabyldaýǵa bolatynyn aıtty, dep habarlaıdy Almaty-akshamy.kz Zakon.kz-ke silteme jasap.
Jandos Nurmaǵambetov «Atom energıasyn paıdalaný týraly» zańǵa sáıkes, ákimdiktiń kelisimi negizinde atom elektr stansıalaryn qaı jerde salý kerek ekenin úkimet ózi sheshetinin aıtty.
«Mınıstrliktiń vedomstvoaralyq komısıasy birinshi stansıany Úlken aýylynyń mańyna salý kerek ekenin aıtyp otyr. Biz Almaty oblysynyń máslıhatyna ótinish bildirdik. Olar aýyl jurtshylyǵy jobany qoldasa degen shartpen kelisimin berdi. Qoǵamdyq tyńdaýlarǵa turǵyndar da, belsendiler de, qoǵamdyq uıymdar da qatysyp jatyr. Onda qoıylǵan suraqtardyń barlyǵyn biz taldaımyz», - dedi vıse-mınıstr.
Jandos Nurmaǵambetovtyń aıtýynsha, stansıa qurylysynyń naqty orny týraly sheshim qabyldaý úshin Almaty oblysy ákimdiginiń kelisimi qajet.
«Búgin ákimdik bar nemese joq dep, jaýabyn aıtady. Osydan keıin bul stansıany salý týraly sheshim qabyldanady. Biraq stansıa salynbaı turyp, tehnıkalyq-ekonomıkalyq negizdemesi jasalady. Biz qorshaǵan ortaǵa áserin baǵalaımyz. Barlyq múddeli taraptyń pikirin jınaımyz. Bul jumys endi bastalyp jatyr», - dep túsindirdi spıker.
«Turǵyndar AES qurylysyna qarsy daýys berse ne bolady?»,- dep naqtylady jýrnalıser.
«Búgin turǵyndardyń kóbi «joq» dese, Almaty oblysy máslıhatynyń sheshimi kúshine enbeıdi. Bul - ruqsat bolmaıdy degen sóz. Jańa oryn izdeımiz», - dep túıindedi sózin Jandos Nurmaǵambetov.
Buǵan deıin Úlken aýylynda AES qurylysyna qatysty qoǵamdyq tyńdaýlar ótip jatqany habarlanǵan edi. Bul másele qyzý pikirtalas týdyrdy: keıbir jergilikti belsendiler AES salýǵa qarsy, biraq aýyl turǵyndarynyń kóbi qurylysty qoldap, onyń ekonomıkalyq paıdasyn aıtyp jatyr.