Áleýmettik jelilerde Almaty oblysy Úlken aýylynda atom elektr stansıasynyń (AES) qurylysy bastalǵany týraly aqparat taraǵan bolatyn.
Almaty oblysy Jambyl aýdanynyń ákimdigi bul derekti joqqa shyǵardy, dep habarlaıdy aqshamnews.kz.
Áleýmettik jelide taraǵan beınerolıkte, boljam boıynsha, “Google Maps” onlaın servısy arqyly qurylys obektileri kórsetiledi. Aýdan ákimdigi bergen málimetinshe, ondaǵy nysandardyń atom elektr stansıasy ekeni shyndyqqa janaspaıdy.
Beınejazbada kórsetilgen nysan 2011 jyly Balqash jylý elektr ortalyǵy (JES) qurylysy jobasyn júzege asyrý kezinde salynǵan ınfraqurylym. Joba kómirmen jumys isteıtin jylý elektr stansıasynyń qurylysyn qamtydy. Joba aıasynda tıisti ınfraqurylymnyń, sonyń ishinde jumysshylarǵa arnalǵan turǵyn kenttiń qurylysy bastaldy. 2014 jyly «Balqash jylý elektr ortalyǵy» jobasyn júzege asyrý toqtatyldy, - dep habarlady ákimdikten.
Sondaı-aq, Jambyl aýdanynyń ákimdigi onlaın-servıstiń kartografıalyq derekterine túzetýler engizý jáne jalǵan aqparattyń odan ári taralýyna jol bermeý úshin Qazaqstan Respýblıkasy Sıfrlyq damý, ınovasıalar jáne aeroǵarysh ónerkásibi mınıstrligine (SDIAÓM) ótinim jiberilgenin málimdedi.