IIDM Avtomobıl joldary komıteti tóraǵasynyń orynbasary Jambyl Baqtıar Almaty oblysynyń İle, Talǵar, Qarasaı aýdandaryna baryp, jergilikti turǵyndarymen kezdesý ótkizdi, dep habarlaıdy Almaty-akshamy.kz.
Talqylaý barysynda óńir turǵyndaryn Úlken Almaty aınalma tas jolynyń tólem quny máselesi qyzyqtyrdy. Buǵan Jambyl Baqtıar aqyly jol qurylysyna jumsalǵan qarajatqa qaraı eseptelip jasalǵanyn jetkizdi.
- Jyl saıynǵy ınflásıanyń ósýin de qarastyrdyq. Biz ınvestordyń quıǵan qarjysyn ózine qaıtaryp berýge mindettimiz. Onyń ústine, Talǵar, İle, Qarasaı aýdan ákimderiniń pikirine qulaq asyp, jergilikti halyq turǵyndary úshin arnaıy jeńildik qoıdyq. Baǵalary da qoljetimdi. Al aýyr júk kólikteri boıynsha baǵany qaıta basshylyqpen qarastyramyz, - dep jaýap berdi Avtomobıl joldary komıteti tóraǵasynyń orynbasary.
Jıynda, sondaı-aq, abonenttik tólemdi alýdyń amaldary aıtyldy. Qoıylǵan barlyq suraqqa «ÚAAAJ Investısıalar jáne operasıalar» JSHS joldy paıdalaný jáne kútip-ustaý jónindegi jetekshisi Nurlanbek Ómirbaev tushymdy jaýap bere aldy.
«Preferensıa mehanızmine sáıkes bir aıǵa nemese bir jylǵa abonementti ákimdikte nemese ár aýdannyń arnaıy halyqqa qyzmet kórsetý ortalyǵynan alýǵa bolady. Joldy paıdalanýshy tulǵa RFID-belgilerin (kólik týraly málimetterdi oqý jáne esepteý júıesi) arqyly bile alady. Eger abonement aqysy der kezinde tólenbegen jaǵdaıda, tarıf boıynsha tólem alynady. Sondaı-aq, aqyny aldyn ala tólem negizinde ótseńiz bolady nemese júrip ótkennen keıin jeti kún ishinde tóleı alasyz. Iaǵnı, siz aqyly jolmen baıqamaı ótip ketken bolsańyz 7 táýlik aralyǵynda tólem jasaı alasyz. Al merziminen asyp ketken jaǵdaıda júrgizýshige ákimshilik shara qoldanylýy múmkin. Sonymen qatar, eger kólik quraly ruqsat etilgen gabarıtten asyp ketse, onda aqparat birden Indýstrıa jáne ınfraqurylymdyq damý mınıstrligine beriledi», - dep túsindirdi Nurlanbek Ómirbaev.
Sonymen qatar, jıyn barysynda Úlken Almaty aınalma jolynyń artyqshylyqtary da atalyp ótti. Máselen, eger sizdiń kóligińiz jol ústinde synyp qalǵan jaǵdaıda, ÚAAAJ qyzmetkerleri kóligińizdi jaqyn jerdegi turaqqa tegin jetkizýge kómektesedi. Aıta keteıik, Úlken Almaty aınalma avtomobıl jolynda saǵatyna 140 shaqyrym jyldamdyqpen júrý qarastyrylǵan. Jol paıdalanýshylardyń qaýipsizdigin qamtamasyz etý maqsatynda jol boıynda beınebaqylaý kameralary ornatylǵan. Sondaı-aq, atalmysh kúre jolǵa qatysty 2277 qysqa nómirine tegin habarlasý arqyly azamattar barlyq aqparatty bile alady.
Úsh kúnge sozylǵan sharada ár aýdannyń máslıhat depýtattary halyq tarapynan sóz sóılep, usynystaryn aıtty. Máselen, Talǵar aýdanynda ótken jıynda máslıhat depýtaty Gúljan Túsibıanova Úlken Almaty aınalma joly mańyn abattandyrý máselesin kóterdi.
- Talǵar mańyna kógaldandyrý jumystaryn isteýdi usynamyn. Tarıf boıynsha aıtatyn bolsam, bir jyldyq tólem aqysyn tómendetsenizder jaqsy bolar edi. Sebebi, bir jyldyq tólem qarapaıym halyq úshin tıimdi bolý kerek. Taǵy bir másele bizdiń óńirde múmkindigi shekteýli azamattar kóp. Ol kisiler úshin arnaıy jeńildik qarastyryp kórseńizder, ıgi bolar edi, - dep jetkizdi máslıhat depýtaty.
Jambyl Baqtıar halyqpen kezdesý barysynda qoıylǵan suraqtarǵa jaýap berip qana qoımaı, turǵyndarmen birge ÚAAAJ boıyn aralap, týyndaǵan máselelermen tikeleı tanysyp, ınvestorlarǵa jáne aýdan ákimdikterine tıisti tapsyrmalar berdi.