FK «Aqtóbe» jasóspirimder komandasynyń 15 jastaǵy qorǵaýshysy Aron Musa qaıtys boldy, dep habarlaıdy Aqshamnews.kz klýbtyń baspasóz qyzmetine silteme jasap.
"Keshe, QJ league týrnırinde oınaıtyn “Aqtóbe U-16” komandasynyń oıynshysy, 15-jastaǵy fýtbolshy Aron Musa ómirden ozdy. Aronnyń otbasynda úlken qaıǵy oryn aldy. Aron baýyrymyzben birge ájesi jáne nemere aǵasy da kóz jumdy. Musa áýletine, týǵan týystaryna qaıǵyra kóńil aıtamyz", - delingen klýb habarlamasynda.
Aron men onyń týystarynyń óliminiń sebepteri naqtylanǵan joq. Resmı rastalmaǵan málimet boıynsha, otbasy kómirqyshqyl gazynan ýlanyp, qaza tapqan bolýy múmkin.
Musa 2010 jylǵy 18 sáýirde dúnıege kelgen. "Aqtóbe" U-16 sapyndaǵy debúti 2 tamyzda ótti. Keıingi machin 4 qazanda ótkizgen. Bıylǵy maýsymda Aron Musa "Aqtóbeniń" jasóspirimder quramasynda jalpy alty oıynǵa qatysty.
Aıta keteıik, bul keıingi bir aı ishindegi qazaqstandyq fýtboldaǵy ekinshi qaıǵyly jaǵdaı. 23 qyrkúıekte elordalyq "Jeńis" klýbynyń 19 jastaǵy fýtbolshysy Vıktorıa Qaısarınova Pavlodar – Astana tasjolynda bolǵan jol-kólik oqıǵasynan qaza tapqan edi.