Qazaqstan Respýblıkasy Ulttyq ulanynyń Almaty qalasynda ornalasqan 5571 áskerı bóliminiń jaýyngerleri Qonaev qalasynyń jaǵajaıynda pyshaq alyp júrgen er adamdy quryqtady.
Oqıǵa 27 tamyzda keshki saǵat 18.10 shamasynda bolǵan. Qyzmette júrgen áskerı jasaqqa jas jigit kelip «Maıamı» demalys ornynyń aýmaǵynda qolynda pyshaǵy bar er adam turǵyndarǵa balaǵat sózder aıtyp júrgeni týraly habarlaǵan.
Oqıǵa ornyna kelgen áskerı jasaq bastyǵy qatardaǵy Nuraıdar Batyrbaı, patrúlshi jaýyngerler qatardaǵy Nurlybaı Ábjappar men Dosymjan Quralbek qoǵamdyq tártipti buzyp, ózin agresıvti ustaǵan azamatty baıqaıdy. Ol sol mańdaǵy adamdarǵa qoqan-loqy kórsetip, til tıgizgen. Qorǵanystyń túrli ádis-tásilderin meńgergen jasaq shapshań áreket etip, buzaqynyń qolyndaǵy pyshaǵyn qaǵyp jibergen, ile qolyn artqa qaıyryp, kúdiktini tyrp etkizbedi. Al qolyndaǵy as úı pyshaǵy tárkilendi.
“Biz ózin agressıvti ustap, adamdarǵa balaǵat sóz aıtyp júrgen er azamatty baıqadyq ta, soǵan qaraı bardyq. Ol qolyndaǵy pyshaǵyn jalańdatyp, jan-jaǵyna silteı bastady. Ózine eshkimniń jaqyndamaýyn talap etip, balaǵat sózder aıtyp aıqaılady. Biz dereý ol azamatty qolǵa túsirý úshin áreket jasadyq, sebebi ol aınalasyna qaýip tóndirdi. Jekpe-jek urysynyń tásilderin paıdalanyp aqyry biz ony ustadyq”, - deıdi qatardaǵy Nuraıdar Batyrbaı.
Ulttyq ulan sarbazdary 1985 jyly týǵan adamdy odan ári tekserý úshin Qonaev qalasy İİB polısıa qyzmetkerlerine tabystady.