Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
12 - premer
Kesheden beri eldegi eń temeperatýrasy joǵary bolǵan suraqtyń jaýaby búgin tabyldy. Esh táýiptiń qumalaǵyna túspegen, eshbir jaýyrynshy anyqtaı almaǵan kandıdat Oljas Bektenovti QR Premer-mınıstri etip taǵaıyndaý týraly Prezıdenttiń jarlyǵy shyqty.
Q.Toqaev qol qoıǵan jarlyqta: «Oljas Abaıuly Bektenov Qazaqstan Respýblıkasynyń Premer-Mınıstri bolyp taǵaıyndalsyn, ol burynǵy atqarǵan laýazymynan bosatylsyn», - delingen.
Sonymen qatar Prezıdenttiń jarlyǵymen birneshe mınıstr óz ornynda qaldy.
Qoshanov qaıda júr?
Májilis tóraǵasynyń búgingi Májilis otyrysyna qatyspaý sebebi belgili boldy. Erlan Qoshanov koronavırýs ınfeksıasyna shaldyqqan.
Úkimet basynan úmit kóp...
Búgin Prezıdent Qasym-Jomart Toqaev Májilistiń jalpy otyrysynda jańadan jasaqtalatyn Úkimettiń aldynda turǵan mindetterdi atap, dál qazir bosańsıtyn kez emes ekenin eske saldy.
«Biraq biz elimizdiń áleýetin odan ári arttyrýmyz kerek. Bul aldymyzda turǵan bıik maqsat. Sondyqtan bosańsýǵa bolmaıdy. Basqa sózben aıtqanda, uzaqmerzimdi strategıalyq maqsattarǵa qol jetkizý úshin munyń bári jetkiliksiz ekeni anyq. Qazaqstandy ozyq elge aınaldyrýymyz kerek. Bul jaı uran emes. Bul – bizdiń naqty josparymyz. Bizge keregi – damýdyń sara joly. Sondyqtan túbegeıli saıası reformalar júrgizýmen qatar elimizdiń qoǵamdyq-ekonomıkalyq ómirinde tereń ózgerister jasaý úshin batyl sharalar qabyldaýymyz qajet. Eń bastysy, bizdiń barlyq is-áreketimiz Ádiletti Qazaqstan qurý qaǵıdatyna saı bolýǵa tıis», dedi Qasym-Jomart Toqaev.
Prezıdent Ákimshiliginiń Basshysy taǵaıyndaldy
Ol buǵan deıin Qazaqstan Respýblıkasy Prezıdentiniń İs basqarýshysy bolǵan Aıbek Dádebaev.
Qozǵalys shektelip tur
Aýa raıynyń qolaısyzdyǵyna baılanysty 6 oblysta respýblıkalyq mańyzy bar avtojoldardyń 16 ýchaskesinde kólik qozǵalysyna shekteý engizildi. Avtokóliktiń barlyq túrine shekteý engizilgen. Avtojoldardy qysqy kútip-ustaýǵa 673 birlik tehnıka men 1285 jolshy jumyldyryldy.
Ulybrıtanıanyń 75 jastaǵy koroli III Charlzdiń qaterli isikke shaldyqqanyn Býkıngem saraıy habarlady.
«Dıagnostıkalyq tekserýler qaterli isiktiń túrin anyqtady. Koról dúısenbiden bastap turaqty emdelýge kiristi. Ol tezirek emdelýge qushtar jáne múmkindiginshe memlekettik qyzmetke tolyqtaı oralýǵa asyǵady», - delingen habarlamada.
Bıylǵy deklarasıany kim tapsyrý kerek?
2024 jylǵy 1 qańtardan bastap deklarasıany zańdy tulǵalardyń basshylary men quryltaıshylary (qatysýshylary), dara kásipkerler, sondaı-aq olardyń jubaılary tapsyrýǵa tıis. Bul talap áreketsiz jáne qyzmetin toqtatqan tulǵalarǵa da qoldanylady.
25 mln teńgeni jymqyrǵan
«Ertis ormany» basshysy para aldy degen kúdikke ilindi. Ol kásipkerlerge iskerlik ormandy zańsyz keskeni jáne satqany úshin para alýdyń qylmystyq sqemasyn uıymdastyrǵany anyqtaldy. Rezervat basshysy 2 aı merzimge qamaýǵa alyndy. Sonymen qatar, Rezervattyń bes býhgalterine qatysty sotqa deıingi tergeý júrgizilýde, olar 2021-2023 jyldar aralyǵynda ózderiniń kartochkalyq shottaryna, sondaı-aq mekemeniń jumys istep turǵan jáne burynǵy qyzmetkerleriniń shottaryna jalaqyny esepteý jáne aýdarý arqyly 25 mln teńge somasynda asa iri mólsherde búdjet qarajatyn jymqyrǵan. Keltirilgen materıaldyq zalal ishinara óteldi. Tergeý jalǵasýda.
Kolonıadaǵy aǵasyna aqsha ótkizbek bolǵan...
Áıel adam, sómkesiniń ishine aqsha tigip alǵan. Mekeme qyzmetkerleriniń qyraǵylyǵynyń nátıjesinde tekserý kabınetinen 5000 jáne 10 000 teńge nomınalyndaǵy aqsha tabylyp, tárkilendi.
«Eskertýlerge qaramastan, sottalǵandardyń týystary men jaqyn adamdary talaptardy oryndamaı, mekemedegi sottalǵandarǵa tyıym salynǵan zattardy ótkizý áreketterin jalǵastyryp jatyr», – dedi mekeme bastyǵy Ermek Kúzdeýbaı.
Eldegi qoqys polıgonynyń 80 paıyzǵa jýyǵy normaǵa saı emes
«Ákimdiktermen jáne ortalyq memlekettik organdarmen birlesip shaǵyn jáne shalǵaıdaǵy eldi mekenderde qatty turmystyq qaldyq polıgondaryn resimdeý tetikteriniń pysyqtalyp jatqandyǵyn atap ótken jón. Atap aıtsaq, osy oryndarǵa qoıylatyn mindetti eń tómengi ekologıalyq, sanıtarıalyq-epıdemıologıalyq jáne qurylys salasyndaǵy talaptar talqylanýda», - dep habarlaıdy QR ekologıa jáne tabıǵı resýrstar mınıstriniń mindetin atqarýshy Erlan Nysanbaev.
Almatyda urlyq azaıypty
Polısıanyń aldyn alý sharalarynyń arqasynda bótenniń múlkin urlaý sany 36%-ǵa azaıdy, bul qylmystyń ashylýy 13,9% - ǵa artqan.
«Kóbinese 1-2 qabattaǵy páterlerde turatyn adamdar terezeni ashyp ketedi. Bul jaǵdaıda terezeler torlarmen jabdyqtalmaǵan. Sondaı-aq, urylar áleýmettik jelilerdi baqylap otyrady, ıeleri demalysqa ketkenin sol jerden bilip otyrady. Adamdar ózderi «biz 10 kúnnen keıin bolamyz» dep demalysqa ketkenderin ańdamaı habarlap otyrady», - dedi Almaty qalasy Polısıa departamentiniń resmı ókili Saltanat Ázirbek.
Jemqorlardan jıyrma mektep
Olardan tárkilengen qarjyǵa taǵy 20 jańa mektep salynady. Bul qarajatqa salynatyn bilim berý nysandarynyń tizimi vedomstvonyń saıtynda jarıalanǵan.
Shymkent qalasynda, Jetisý jáne Qyzylorda oblystarynda úsh mektepten, Jambyl oblysynda tórt mektep, Astana qalasy men Almaty oblysynda eki mektepten, BQO, Pavlodar, Soltústik Qazaqstan oblystarynda bir mektepten salynady.
Parıjge baramyz ba, júldeli bolamyz ba?
Parıj Olımpıadasyna daıyndyq jumystaryna arnalǵan Shtab óz jumysyn jalǵastyryp jatyr.
QR Sport komıteti málim etkendeı, XXXIII jazǵy Olımpıa oıyndary 26 shilde men 11 tamyz aralyǵynda ótedi.
Qazirgi tańda Qazaqstan ulttyq quramasynyń qorjynynda Parıj Olımpıadasynyń 19 lısenzıasy (sporttyń 8 túrinen) bar (sadaq atý – 4, veloshosse – 3, nysana kózdeý – 5, qazirgi bessaıys – 2, boks – 2, grek-rım kúresi – 1, erkin kúres – 1, sporttyq gımnastıka – 1). Olımpıa oıyndaryna deıin 69 lısenzıalyq jarys qaldy. Onyń ishinde 5 álem chempıonaty, 7 Azıa chempıonaty jáne 57 reıtıńtik týrnır bar.
Ózgege ómir syıla...
Erteń Almaty qalasy Qoǵamdyq densaýlyq saqtaý basqaramasynyń SHJQ «№5 qalalyq emhana» KMK jáne «Qamqor Charity» QQ-nyń uıymdastyrýymen dúnıejúzilik qaterli isikke qarsy kúres kúnine oraı qan donorlaryna arnalǵan «Qan tapsyryp, ózgege ómir syıla» atty aksıasy ótedi.
Tapsyrylǵan qan Almaty qalasyndaǵy «Qazaq onkologıa jáne radıologıa ǵylymı-zertteý ınstıtýty» men «Pedıatrıa jáne balalar hırýrgıasy ǵylymı ortalyǵynyń» onkologıa jáne onkogametologıa bólimshelerinde emdeletin naýqastardyń emine qoldanylady.