Turǵyndar aılap sýsyz qalýda
Senbi, 20 mamyr kúni, Premer-Mınıstr Álıhan Smaıylov Úılestirý shtabynyń otyrysyn ótkizdi. Onda eldi mekenderdi sýmen qamtamasyz etý sharalary qaraldy, dep habarlaıdy Almaty-akshamy.kz primeminister.kz saıtyna silteme jasap.
Indýstrıa jáne ınfraqurylymdyq damý mınıstri Marat Qarabaev Memleket basshysynyń tapsyrmasyna sáıkes 2025 jyldyń sońyna deıin halyqty sapaly aýyz sýmen 100% qamtamasyz etý josparlanyp otyrǵanyn baıandady.
Búgingi tańda aýyz sýǵa qoljetimdilik qalalarda – 98,4%, aýyldarda – 94,5% qurap otyr.Eń az qamtý Abaı, Aqmola jáne Jambyl oblystarynyń qalalarynda, sondaı-aq Aqmola, Qostanaı jáne Soltústik Qazaqstan oblystarynyń aýyldarynda tirkelgen.
Bıyl sýmen jabdyqtaý, sý burý júıelerin salý jáne rekonstrýksıalaýǵa respýblıkalyq búdjetten 402 jobany iske asyrýǵa 280 mlrd teńge bólindi. Jalpy, 2025 jylǵa deıin qalǵan 25 qala men 1 395 aýyldyń halqyn taza aýyz sýmen qamtamasyz etý qajet. Osyǵan baılanysty respýblıkanyń árbir eldi mekenin qamtıtyn tıisti jospar ázirlendi. Onyń ishinde izdestirý-barlaý jumystaryn júrgizý, jobalaý-smetalyq qujattamany ázirleý jáne qurylys-montajdaý jumystarynyń barysyna monıtorıń júrgiziledi.
Toptyq sý qubyrlaryn salý jáne rekonstrýksıa jumystarynyń barysy týraly Ekologıa vıse-mınıstri Nurken Shárbıev baıandady. Qostanaı oblysynyń ákimi Qumar Aqsaqalov, Túrkistan oblysynyń ákimi Darhan Satybaldy, Batys Qazaqstan oblysynyń ákimi Narıman Tóreǵalıev óńirlerde atqarylyp jatqan sharalarǵa toqtaldy.
Premer-Mınıstr mamyr aıynyń basynda Úkimet otyrysynda aýyz sý jobalary boıynsha «aıaqtalmaǵan qurylystar» týraly aıtylǵanyn eske saldy. Olardy aıaqtaımyz degenshe, qoldanystaǵy ınfraqurylymdar jaramsyz bolyp qalýda.
«Aqtóbe qalasyndaǵy Qarǵaly shaǵyn aýdanynyń turǵyndary sýyq sý men ystyq sýdyń jıi toqtap qalatynyna shaǵym aıtýda. Aqmola oblysynyń Egindikól aýdanynda ábden tozyǵy jetken Nura sý ótkizgishi jalǵyz ózi 12 aýyldy sýmen qamtamasyz etip otyr. Ondaǵy sýdyń shyǵyny 70-80% jetedi. Bul aýyldardyń turǵyndary qubyrlardyń jıi jarylýynan aılar boıy sýsyz qalady», — dedi Álıhan Smaıylov.
Ol sondaı-aq Almaty oblysyndaǵy Talǵar aýdanynyń Kishi Baıserke aýylynda sý qubyry tolyq qýatynda jumys istemeıtinin aıtty.
«Bular bıyl halyqtan resmı túrde kelip túsken 9 myń shaǵymnyń birneshe mysaly ǵana», — dep atap ótti Premer-Mınıstr.