Úkimet úıinde QR Premer-Mınıstri Álıhan Smaıylovtyń tóraǵalyǵymen ótken keńeste Memleket basshysynyń Astana qalasyn odan ári damytý jónindegi tapsyrmalaryn oryndaý jónindegi sharalar qaraldy, dep habarlaıdy almaty-akshamy.kz
Elorda ákimi Jeńis Qasymbek jańa baǵdarlamalyq qujattardy, onyń ishinde Astanany damytýdyń 2035 jylǵa deıingi bas josparyn, 2030 jylǵa deıingi qaıta jańartý baǵdarlamasyn jáne Kógaldandyrýdyń biryńǵaı tujyrymdamasyn ázirleý jumystary týraly baıandady.
Sonymen qatar qala basshysy 3-JEO-nyń birinshi kezeginiń jáne jalpy qýaty 1 130 Gkal bolatyn eki gaz jylý stansıasynyń qurylysy týraly aıtyp berdi. Bul turǵyn úı qurylysynyń qazirgi qarqyny saqtalsa, 2026 jylǵa deıin jylý energıasy qoryn jınaýǵa múmkindik beredi.
Sýmen jabdyqtaý boıynsha uzyndyǵy 44 shaqyrym sý qubyrynyń ekinshi jelisin salý jumystary júrip jatyr. Sondaı-aq Nura jer asty sýlarynan júretin arnaıy qurylystar keshenin, Telman sorǵy stansıasyn keńeıtýdi, Q. Sátpaev kanalynan júretin jańa sý qubyrynyń jobalaryn jáne tórtinshi sorǵy-súzgi stansıasyn pysyqtaý jumystary júrip jatyr. Josparlardyń oryndalýy 2035 jylǵa deıin qajetti qordy qamtamasyz etedi. Búgingi tańda qalada sý tapshylyǵy joq.
Kólik ınfraqurylymyn damytýǵa keletin bolsaq, bıyl avtojoldardy salý jáne jóndeý, sondaı-aq Táýelsizdik kópirin aıaqtaý boıynsha 30 joba iske asyrylýda. Aldaǵy ýaqytta Táýelsizdik dańǵylyn Qabanbaı batyr dańǵylyna deıin jalǵastyrý jumystaryn bastaý josparlanyp otyr, bul sol jaǵalaýdaǵy negizgi arterıalardyń júktemesin azaıtýǵa múmkindik beredi. Oǵan qosa Gazmashapparatýra aýdanynda (Kenesary kóshesiniń bastapqy jaǵy) eki kópir salý pysyqtalýda, olar Turan dańǵyly men Aıtmatov kóshesindegi júktemeni azaıtýǵa múmkindik beredi.
Sonymen qatar elorda ákimi úleskerlerdiń máselelerin sheshý, iri káriz-tazartý qurylysyn jobalaý, LRT jobasyn júzege asyrý jáne basqa da birqatar máseleni pysyqtaý týraly aıtyp berdi.
Memleket basshysy bergen tapsyrmalardyń oryndalý barysy týraly óz salalary boıynsha Premer-Mınıstrdiń orynbasary – eńbek jáne halyqty áleýmettik qorǵaý mınıstri Tamara Dúısenova, ındýstrıa jáne ınfraqurylymdyq damý mınıstri Marat Qarabev, ekologıa jáne tabıǵı resýrstar mınıstri Zúlfıa Súleımenova, energetıka mınıstri Almasadam Sátqalıev, aýyl sharýashylyǵy mınıstri Erbol Qarashókeev, sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın, ǵylym jáne joǵary bilim mınıstri Saıasat Nurbek baıandama jasady.
Premer-Mınıstr elordany damytý máselelerin sheshý Úkimet jumysynyń mańyzdy baǵyttarynyń biri ekenin atap ótti.
«Memleket basshysy atap kórsetken barlyq másele boıynsha qajetti sharalardy iske asyrýdy jalǵastyrý kerek. Atap aıtqanda, elorda ákimdigi bólingen qarjylandyrýdy paıdalana otyryp, barlyq ınfraqurylymdyq jobada, onyń ishinde úleskerleri bar problemalyq qurylys nysandarynda qurylys-montajdaý jumystarynyń ýaqytyly aıaqtalýyn qamtamasyz etýi tıis», — dedi Álıhan Smaıylov.
Sonymen qatar Premer-Mınıstr respýblıkalyq búdjetti qalyptastyrý jáne naqtylaý kezinde Astananyń basym jobalaryn qarjylandyrýdy qarastyrýdy, sondaı-aq jyl sońyna deıin Elorda aglomerasıasyn damytýdyń keshendi josparyn ázirlep, ony Úkimetke engizýdi tapsyrdy.