Memleket basshysy Qasym-Jomart Toqaevtyń qytasýymen Úkimettiń keńeıtilgen otyrysy ótýde.
Onda el Prezıdenti memlekettik satyp alý týraly zań jobasyn qaıta pysyqtaýdy tapsyrdy, dep habarlaıdy Almaty-akshamy.kz.
«Memlekettik satyp alý, memleket pen jekemenshik seriktestigi, qurylys salasyn retteý júıesin reformalaý qajet. Bul jumys ınvestısıa tartý jáne búdjet qarajatyn tıimdi paıdalaný isindegi reformalarmen barynsha úılesip, ony tolyqtyra túsýge tıis. Qazir Májiliste memlekettik satyp alý týraly zań jobasy qaralyp jatyr. Bul qujatty pysyqtap, jetildirý qajet. Parlament depýtattarynan osyǵan erekshe mán berýdi suraımyn. Eń aldymen, aýdıtorlardyń qyzmetin retteý kerek», - dedi Prezıdent.
Qasym-Jomart Toqaev bul oraıda árkimniń zań normalaryn óz qalaýyna qaraı ıkemdep, túsindirýine jol berilmeýi kerektigin atap ótti.
«Bul – taýar, jumys jáne qyzmet usynýshylarǵa qoıylatyn talaptarǵa da qatysty másele. Olardyń belgilengen merzimdi buzǵany jáne jumysty sapasyz oryndaǵany úshin jaýapkershiligin kúsheıtý qajet. Munyń, ásirese, qurylys salasy úshin mańyzy zor. Memlekettik satyp alý týraly jańa zań ERS sharttaryn qoldana otyryp, ınfraqurylym jobalaryn tolyq júzege asyrýǵa múmkindik berýge tıis. Bul rette ERS sharttaryn jasaýǵa daıyndyq sharalarynyń merzimi qysqa bolýǵa tıis. Sonda ákimdikter basymdyq berilgen ári shuǵyl júzege asyrylýǵa tıis jobalardy tezdetedi», - dedi Memleket basshysy.