QR Úkimet basshysy Álıhan Smaıylovtyń tóraǵalyǵymen ótken otyrysta otandyq temirjol salasynyń damýyna qatysty máseleler qaraldy.
Kólik salasyna jaýapty mınıstrdiń aıtýynsha, 2023 jyldyń 10 aıynda temirjol kóligimen júk tasymaldaý kólemi 200 mln 46 myń tonnany qurap, 3 paıyzǵa artqan. Jyldyń sońyna deıin shamamen 300 mln tonna júk tasymaldanatyn bolady, dep habarlaıdy Almaty-akshamy.kz Kólik mınıstrligine silteme jasap.
Osy rette temirjol kóligi ekonomıkanyń eksporttyq baǵyttaǵy qajettilikterin tolyq kólemde qamtamasyz etetinin aıta ketken oryndy. Iaǵnı, jyl basynan beri eksporttyq tasymaldaý 70 mln 700 myń tonnany, al ósim 8,5 paıyzdy quraıdy.
«Temirjol kóligi – ekonomıkany damytýdyń mańyzdy aspektileriniń biri. Búgingi tańda elimizdiń geografıalyq ornalasýy tranzıttik áleýetti damytýǵa zor múmkindik berip otyr», - dedi Kólik mınıstri Marat Qarabaev.
Tranzıttik tasymaldar týraly aıta kele, Marat Kárimjanuly atalǵan tasymal túri belsendi qarqynmen damyp kele jatqandyǵyna basa nazar aýdardy. 10 aıdyń qorytyndysy boıynsha tranzıttik júk tasymaldaý kólemi 19 paıyzǵa artqan. Óz kezeginde konteınerlik tasymaldar da 15%-ǵa ulǵaıǵan. Sonymen birge jolaýshylardy tasymaldaý barysynda da aıtarlyqtaı ósim baıqalady.
«Memleket basshysynyń eldiń kólik-logıstıkalyq áleýetin damytý jónindegi tapsyrmasy sheńberinde, tranzıttik tasymaldarǵa erekshe nazar aýdarylyp otyr. Konteınerlik tasymaldardyń kólemi ótken jylǵy kórsetkishti 2020 jylmen salystyrǵandaǵy 29 paıyzǵa artty. Sońǵy jyldary Qytaıdan Eýropa jáne kórshiles elderge Qazaqstan arqyly jóneltiletin tranzıttik júk kólemi edáýir artyp, Qytaı Halyq Respýblıkasynyń qazaqstandyq tranzıttik tasymaldaýdaǵy úlesi 27%-ǵa deıin ulǵaıdy»,- dep atap ótti mınıstr.
Salanyń aǵymdaǵy jaı-kúıi týraly aıta kele, M.Qarabaev Úkimet múshelerin salany odan ári damytýdy kózdeıtin aldaǵy ýaqytqa josparlanǵan jumystar barysymen tanystyryp ótti. Onyń ishinde, shekaralyq pýnkterdi damytý, magıstraldyq temir jol jelilerin damytý (jańa jáne ekinshi joldardy salý, toraptyq stansıalardy jańǵyrtý, temirjoldardy kúrdeli jóndeý), lokomotıv jáne júk vagondarymen qamtamasyz etý, tarıftik saıasatty jetildirý jáne jolaýshylar tasymalyna arnalǵan vagondardy jańartý.
Mınıstrdiń aıtýynsha, joǵaryda atalǵan baǵyttardy júzege asyrý 2029 jylǵa qaraı tranzıttik tasymaldar kólemin aıtarlyqtaı ulǵaıtýǵa jol ashady.
El aýmaǵyndaǵy shekaralyq pýnktilerdiń qýattylyǵyna toqtalatyn bolsaq, búginde kórshi bes elmen 27 temirjol shekara pýnkteri arqyly baılanys ornatylǵan. Aıta keterligi, Qytaı baǵytyndaǵy eki shekara pýnktin modernızasıalaý kózdelip otyr. Al Dostyq stansıasynyń modernızasıalaý jumystary Dostyq – Moıynty ýchaskesinde ekinshi joldyń qurylysy sheńberinde qarastyrylyp otyr. Bul sharalar eki stansıanyń ótkizý qabiletin jylyna qosymsha 14 mln tonnaǵa deıin ulǵaıtýǵa múmkindik bermek. Sondaı-aq Bahty – Tachen úshinshi ótkizý pýnktin ashý, Darbaza – Maqtaaral temir jol jelisiniń qurlysy josparlanyp otyr.