Páterdiń jaıly bolýyna kúrdeli jóndeýdiń qatysy joq
Júrgizilgen zamanaýı kúrdeli jóndeý de, jańa jıhaz da úıińizge árkez jaılylyq syılaı bermeıdi. «Lıza» basylymy baspanańyzda únemi jaılylyq ornaý úshin ne isteý kerektigin jazdy, dep habarlaıdy Almaty-akshamy.kz.
Kópten armandaǵan baspanańyzǵa qol jetkizgen soń onyń jaıly ári atmosferasy jaqsy bolýyn únemi nazarda ustańyz. Úıdegi jaısyzdyqty týdyratyn mynadaı birneshe sebepterge nazar aýdaryńyz.
1. Bos keńistikti seziný.
Bunyń bólmeniń aýmaǵyna esh qatysy joq. Keń apartamentterde de, záýlim saraıdaı keń úılerde de mundaıdy sezinesiz. Nelikten? Árıne, ıntererlerdiń durys ornalaspaýynan. Jıhazdardy qabyrǵa boıyna ornatyp, bólme ortasyn bos qaldyrý qalypqa aınalǵan. Bul páterdegi jaılylyqqa kedergi keltiredi. Ony túzetý úshin ortaǵa túrli dekorlarmen ústel qoıǵan durys bolady.
Demalý orny jetispeı me? Baspana – bul otbasy músheleriniń rýhanı ári fızıkalyq turǵyda demalatyn orny. Yńǵaıly aýmaq jetispeıtin páterler únemi jaısyzdyq týǵyzady. Jumsaq kreslo, pled jáne aıaq astyna arnalǵan pýfıt satyp alyp, ereksheligin birden sezinińiz.
Bos qabyrǵalar. Qazir burynǵydaı qabyrǵalarǵa kilemder ilinbeıdi. Biraq mamandar bos qabyrǵalar óte kóńilsiz ári usqynsyz kórinetinin aıtady. Qabyrǵalardy ınterer kartınalarmen nemese túrli sergitetin frazalar bar posterlermen ásemdep qoıýǵa bolady.
2. Intererde ózindik «erekshelik» joq.
Kóńilsiz tús palıtrasy, mınımalızm, minsiz tártip – munyń barlyǵy ınterer dızaınyndaǵy zamanaýı trendterge sáıkes keledi. Alaıda óz úıińizge erekshelik berý úshin jarqyn tústerdi de qoldanýyńyzǵa ábden bolady. Ol erekshe pishindegi vaza nemese ananas sýretteri bar dıvan jastyqtary bolýy múmkin.
3. Jaryqtyń durys ornalaspaýy: jaryqtyń bolmaýy ne óte kóp jaryq.
Kúndizgi jaryqtyń azaıýyna oraı jasandy jaryqtandyrýdyń úıdegi jalpy atmosferaǵa qatty áseri bar. Bir qyzyǵy, jaryqtyń jetispeýi de, artyq bolýy da jaılylyqqa teris áser etedi. Dızaınerler páterde birneshe jaryq kózderin ornatýdy usynady.
4. Páterdegi jaısyz temperatýra.
Sýyq páterde jaılylyqtyń bolmaýy belgili. Eger ortalyq jylytý júıesi bul máseleni sheshpese, onda qosymsha jylý kózderin paıdalanǵan jón.
5. Úıdegi tazalyq.
Úıdegi jaılylyq jáne úıdiń únemi shashylyp jatýy bir-birimen úılespeıdi. Eń aldymen eshkim paıdalanbaıtyn qoqys pen eski zattardan qutylý kerek. Árkez úıdi taza ustap, jınap júrińiz.