Búgin Alataý aýdanynda medısına qyzmetkerleri úı-úıdi aralap, vaksınalaý jumystaryn júrgizedi.
Sharanyń basty maqsaty – turǵyndardyń suraqtaryna jaýap bere otyryp, ekpe alý týraly durys aqparat jetkizý. Sondaı-aq, aýdanda úılerdi aralap ekpe salýmen qatar, úlken zaýyt-fabrıka jumysshylaryna aqparat berý jıyndary ótkizilip, jumystan bosaı almaıtyn qyzmetkerlerdi vaksınalaý jumystary qolǵa alynǵan.
Qalalyq №25 emhananyń bas dárigeri Álıa Muratqyzy mundaı sharalar áli jalǵasyn tabatynyn aıtady. Sharanyń ereksheligi – turǵyndardyń arasyndaǵy jalǵan aqparattarǵa tosqaýyl qoıý eken.
«Alataý aýdanynda 7 emhana bar. Onda aýdan boıynsha 236 636 adam tirkelgen. Emhanalarda aqpan aıynan bastap emhanalarǵa vaksınalaý jumystary júrgizilýde. Aldymen medısına, keıin quqyq qorǵaý qyzmetkerleri jáne muǵalimder vaksınalandy. Sáýir aıynan bastap turǵyndarǵa ekpe egý jumystary qolǵa alyndy. Sol ýaqyttan beri Alataý aýdanynda 24 ekpe pýnkti ashyldy. Sonyń ishinde « Aqbulaq», «Kenjehan», «Ójet», «Jibek joly» bazarlary men «Baqorda», «Stroı city» saýda ortalyqtarynda, aýdanǵa qarasty 4 mektepte bar.
Jospar boıynsha vaksına qabyldaýǵa jaramdy turǵyndar sany 88 861 adamdy qurady. Qazirgi ýaqytta 33 547 adam ekpe aldy. Bul vaksına alýǵa jaramdy turǵyndardyń 38 paıyzyn quraıdy. Josparǵa sáıkes, shilde-tamyz aılary aralyǵynda turǵyndardy tolyq vaksınalaý jumystary júrgiziledi», – deıdi bas dáriger.