BǴM Ulttyq testileý ortalyǵy UBT-ǵa daıyndalý úshin tegin synaq testileýin iske qosty.
Testileýdi ortalyqtyń saıtynan siltemesi arqyly onlaın rejıminde ótýge bolady, dep habarlaıdy Almaty-akshamy.kz Elorda.info saıtyna silteme jasap.
Ol úshin testilenýshi aldymen JSN engizip, beıindik pánder kombınasıasyn tańdap, synaqqa qatysa alady.
Synaq testileýi talapkerlerge testileýge daıyndyǵyn jaqsartýǵa jáne qandaı taqyryptardy tereńirek zerdeleý keregin túsinýge kómektesý úshin jasalǵan.
«Mınıstrlik tek testileý kezinde ǵana emes, onyń bastalýyna deıin de qolaıly jaǵdaı jasaý úshin turaqty jumys júrgizip keledi. Sondyqtan talapkerlerge yńǵaıly bolý maqsatynda biz UBT-ǵa daıyndalý úshin onlaın synaq testileýdi iske qostyq. Bul júıe barlyq talapkerge tegin negizde qoljetimdi. Synaq testileýinen ótý kezinde talapker test tapsyrmalarymen tanysýǵa jáne tańdalǵan pánder boıynsha óziniń bilim deńgeıin tekserýge múmkindigi bar. Sondaı-aq bıyl erekshe qajettilikteri bar balalarǵa arnaıy jaǵdaı jasalyp otyr. Olarǵa UBT tapsyrý kezinde qosymsha 40 mınýt qosyldy. Odan bólek, bıyl erekshe bilim berýdi qajet etetin balalar úshin alǵash ret sýretsiz, syzbasyz jáne dıagramsyz tapsyrmalar ázirlendi», - dep aıtty BǴM Ulttyq testileý ortalyǵynyń dırektory Rýslan Emelbaev.
Bıylǵy UBT-nyń taǵy bir jańalyǵy jáne balalardyń óz bilimin shyńdaýyna úlken múmkindik – ár pánge jeke taqyryptyq taldaý júrgizý. Sondaı-aq UTO UBT-ǵa daıyndyq boıynsha tegin onlaın sabaqtardyń sanyn kóbeıtti. Sonymen qatar byltyrdan bastap talapkerlerge kálkýlátor, Mendeleev kestesin jáne tuzdyń erigishtik kestesin paıdalanýǵa ruqsat etildi.
Onlaın synaq testileýi Ulttyq biliktilik testileýin tapsyratyn pedagogter úshin de qoljetimdi. Synaq testileý tehnologıasy negizgi testileýge sáıkes keledi, ıaǵnı pedagogter 2 blok boıynsha test tapsyrady. Onyń kómegimen muǵalimder ózderiniń biliktilik deńgeılerin tekserip, negizgi biliktilik synaǵyna daıyndala alady. Muǵalimder UTO saıtynda prob-nqt.testcenter.kz siltemesi arqyly synaqtan óte alady.