Tıisinshe, grant qaıta qaralady.
Ǵylym jáne joǵary bilim mınıstri Saıasat Nurbek bul baǵytta mınıstrlik Ulttyq qaýipsizdik komıtetimen óte tyǵyz jumys istep jatqanyn aıtty, dep habarlaıdy Almaty-akshamy.kz
«Ózderińizge málim, test tapsyrmalary men olardyń mazmuny «Memlekettik qupıa týraly» zańnyń obektisi sanalady. Sondyqtan munda UQK tergeý júrgizedi. Bıyl búkil óńirde komıtettiń departamentteri tikeleı baqylaý júrgizdi. Bizdiń Ulttyq testileý ortalyǵynyń ókilderimen birge jumys istedi», - dedi mınıstr.
Saıasat Nurbektiń dereginshe, UBT kezinde 300-den astam talapqa sáıkes kelmeý faktileri anyqtalǵan. Ol tekserý jumystary júrgiziletinin aıtady. Sondaı-aq talapker áreketiniń mán-jaıy qyrkúıekke qaraı anyqtalady deıdi.
«Bul jaǵdaıdyń bárimen UQK jáne Ulttyq testileý ortalyǵynyń ókilderimen birlesip, qosymsha tergeý júrgiziledi. Eger aqparat rastalsa, onda bal joıylady. Eger osy ýaqytqa deıin talapker grant ıegeri atanyp úlgerse, onda ol ony keıin qaıtarady. Tıisinshe, grant qaıta qaralady. Qyrkúıek aıynda naqty belgili bolady. Eń joǵary bal jınaǵan, biraq grant almaǵan úmitkerler arasynda osy granttar bóliniske salynady», - dep túıindedi Saıasat Nurbek.