Bul týraly Ulttyq testileý ortalyǵynyń dırektory Rýslan Emelbaev málimdedi.
Naýryzda UBT testileýi kezinde ereje buzǵany úshin aýdıtorıadan barlyǵy 259 adam shyǵarylyp, olardyń test nátıjesi joıyldy. Munymen qatar, ishki tekseris nátıjesinde 9 test tapsyrýshynyń nátıjesi joıylyp, úsh maman qyzmetinen bosatyldy, dep habarlaıdy Almaty-akshamy.kz Elorda.info-ǵa silteme jasap.
Ortalyq basshysynyń aıtýynsha, WhatsApp nómirin ashyq jarıalaǵaly beri halyqpen tyǵyz baılanys ornatqan. Test tapsyrýshylardyń ózi ereje buzý týraly aqparatty habarlap otyrady.
"Endi ár qatysýshynyń óz test nusqasy bolady. Eger test tapsyrýshy tyıym salynǵan zatpen kirýge talpynsa nemese testileýde ustalsa, onda ol ekinshi múmkindigin qoldana almaıdy. Al dál osyndaı jaǵdaı ekinshi múmkindigi kezinde qaıtalansa, onda birinshi múmkindiginiń nátıjesi joıylyp, grant konkýrsyna qatysa almaıdy. Eki múmkindikti paıdalanýdyń óz erejesi bar", – dedi Rýslan Emelbaev.
Munymen qatar, ol UBT aldynda test tapsyrýǵa kómektesetinin aıtatyn alaıaqtar kóbeıgenin eskertti. Osy oraıda, ol túlekterdi táýekelge barmaýǵa shaqyrdy.
"Shyny kerek, testileýdi ońaı tapsyrý úshin keıbir test tapsyrýshylar ártúrli qýlyqqa barýǵa daıyn. Biraq, bizdiń júıeni eshkim aldaı almaıdy. Naýryz aıynda ótken UBT-da testileý kezinde erejelerdi buzǵany úshin aýdıtorıadan barlyǵy 259 adam shyǵarylyp, olardyń nátıjesi joıyldy. Onyń ishinde 9 testilenýshi test suraqtaryn sýretke túsirip, olardy telegram arnalarǵa taratqan. Bul máseleni 2 aı boıy tolyǵymen zerttep, qyzmettik tekseris júrgizdik. Sebebi suraq kóp. Mysaly, test tapsyrmalary qalaı tarady? Kameralar nege eshnárse túsirmegen? Baqylaýshylar qaıda qaraǵan? İshki tekseristiń nátıjesinde 9 test tapsyrýshynyń nátıjesi joıylyp, 3 qyzmetshi jumystan bosatyldy. İs quzyretti organdarǵa jiberildi", – dedi ortalyq dırektory.