Atyraýda «Islam ekstremızmge qarsy» atty halyqaralyq ǵylymı-tanymdyq konferensıa ótti
Konferensıaǵa Qazaqstan musylmandary Dinı basqarmasynyń tóraǵasy, Bas múftı Naýryzbaı qajy Taǵanuly Hazret, Atyraý oblysy ákimi apparatynyń basshysy Nurlybek Jeńisbekuly jáne Ózbekstan, Túrkıa, Sırıa, Qyrǵyztan, Daǵystannan kelgen resmı ókilder qatysty, dep habarlaıdy almaty-akshamy.kz
Jıynda Nurlybek Jeńisbekuly halyq jat aǵymnyń jetegine ermeý úshin dástúrli dinimiz týraly ýaǵyzdardy tek bilimdi din mamandary aıtý qajettigin atap ótti.
-Biz zaıyrly elde ómir súrip jatyrmyz. Osy oraıda dinı saýatty bolý mańyzdy. Onyń deńgeıin kóterý úshin aldymen tarıhymyzdy jaqsy bilý kerek. Abaıdyń qara sózderin jetik biletin ıisi qazaq balasy Qurannyń da fılosofıasyn tereń túsingeni jón. Abyz aqynnyń ár óleńi men qara sózi súıikti paıǵambar Muhammedten (s.ǵ.s) jetken hadıstermen úndesip jatyr. Adamdy izgilikke, kórkem minezge baýlıdy. Dástúrinen jańylmaǵan babalar jolymen júrsek, biz de dinnen adaspaımyz. Qazir dinniń san túrli traformasıaǵa túsip jatqany jasyryn emes. Asyl dinimiz evolúsıaǵa ushyraǵan qoǵamda ómir súrip jatyrmyz. Osy rette, dástúr men dinniń nasıhatyn bilikti mamandar men óz isiniń bilikti bilgirleri júrgizý kerek. Ár nasıhatty halyqtyń sana bıiginde uǵynatyndaı etip uǵyndyrý abzal. Biz Allaǵa, Otanǵa degen mahabbatty alǵa qoıatyn halyqpyz. Birlik pen tatýlyqty tý etken eldiń urpaǵymyz. Osydan jańylmaıyq,-dedi N.Jeńisbekuly.
Óz kezeginde Bas múftı teris aǵymda júrgenderdi ońaltý úshin múftıat tarapynan birqatar aksıa ótip, nátıjesinde 1265 adamǵa oń yqpal jasalǵanyn aıtty. Al jaýapty dinı ońaltý sýbektilerdiń birlesken qorytyndysy boıynsha 285 adam ońalyp, destrýktıvti dinı aǵym ıdeologıasynan bas tartqan.
-Destrýktıvti aǵymdar qoǵamǵa iritki salyp, otbasylyq qundylyqtar men adam densaýlyǵyna qaýip tóndiredi. Olar qazaq ultynyń jáne elimizdegi basqa ulttardyń ádet-ǵurpyna, salt-dástúrine qarsy shyǵady. Jat aǵymnyń jeteginde ketkenderdiń ustanymynan osy atalǵandardy baıqaımyz. Olar bul álemdi óz qalaýyna qaraı ózgertýge tyrysady, dástúrli qundylyqtardy tolyǵymen joıyp jibergisi keledi. Radıkalızm men ekstremızmge jeteleıdi. 2020 jyly biz «Dinı ońaltý» bólimin ashtyq. Qudaıǵa shúkir, destrýktıvti dinı ıdeologıa shyrmaýynan tolyq bas tartyp jatqandar barshylyq. Naqty aıtar bolsaq, múftıattyń dinı ońaltýǵa jaýapty mamandary ótken jyly 11 092 jeke yqpal etý aksıasyn, ıaǵnı jeke kezdesýlerdi júzege asyrdy,-dedi N.Taǵanuly.
Alqaly jıyn sońynda ıslam dininiń qazaq dalasyna kelý tarıhy, onyń halqymyzdyń ádep-ǵurpy men salt-dástúrindegi alar orny, babalar ustanǵan sharıǵat paryzdary, musylmandyq ádep-joralǵylar týraly jazylǵan «Babalar izimen» atty kitaptyń tusaýkeseri ótti.
Anyqtama úshin: Ótken jyly Atyraý oblysynda dinı teris aǵymda júrgen 133 tulǵa dástúrli dinge bet buryp, ońaldy.