Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
Kibise jyl degen ne?
Bul ár tórt jyl saıyn keletin, aqpan 29 kúnge tolatyn, 366 kúnnen turatyn jyl. Táýliktiń shırek bólshegin ár jyl kúntizbesine qosyp aıtýǵa da, esepteýge de yńǵaısyz bolǵandyqtan, shırektiń tórt jylda bir táýliktik mezgil quraıtyny eseptelip, tórttiń aldyńǵy 365 táýlikten turatyn úsh jyly – jaı jyl, 366 táýlikten turatyn sońǵy jyly – Kibise atanǵan.
Ulttyq statısıka búrosynyń aqparatyna saı, 1991 jyldan beri Qazaqstanda kibise kúni, ıaǵnı 29 aqpanda 5110 adam dúnıege kelgen. Olardyń 2707-si – er adamdar bolsa, 2403-i – áıelder. 29 aqpanda dúnıege kelgen adamdar tańdaýly, erekshe qabiletti, talantty bolady.
Ýaqyt aýysarda ne isteý kerek?
Sıfrlyq damý mınıstrligi saǵat beldeýiniń ózgerýine qatysty usynystardy jarıalady. Búgin túnde Mańǵystaý, Atyraý, Batys Qazaqstan, Aqtóbe jáne Qyzylorda oblystarynan basqa barlyq aımaqtar biryńǵaı ýaqyt beldeýine kóshedi. Kóptegen paıdalanýshylar uıaly telefondar men qurylǵylardyń aqparattyq júıelerinen Qazaqstannyń biryńǵaı ýaqyt beldeýine (UTC+5) kóshý týraly habarlamalardy ala bastady. Sıfrlyq damý mınıstrligi qazaqstandyqtarǵa olardy jańartý jáne jańa ýaqyt beldeýine ýaqtyly kóshý boıynsha ámbebap nusqaýlyqtardy usynady.
Dýbaıda Qazaqstannyń saýda úıi ashyldy
Birikken Arab Ámirlikterinde ótip jatqan qazaqstandyq kásiporyndardyń saýda-ekonomıkalyq mısıasy aıasynda 28 mıllıon AQSH dollaryna kelisim jasaldy. Otandyq bıznes-delegasıany Saýda jáne ıntegrasıa mınıstri Arman Shaqqalıev bastap bardy. İs-sharaǵa 60-tan astam otandyq kompanıa ókilderi qatysty.
Ótken jyly Qazaqstan men Ámirlikter arasyndaǵy taýar aınalymy 329 mln AQSH dollaryn qurady. Qazaqstandyq eksport 210 mıllıonnan astam, Ámirlikter bizdiń elge shamamen 119 mıllıon dollardyń taýaryn jóneltken. Saýda-ekonomıkalyq áleýet joǵary, elder saýda kólemin 1 mıllıardqa jetkizýdi josparlap otyr. 2 kúndik kelissózder nátıjesinde taraptar 28 mıllıon 650 myń dollardyń kelisimine qol qoıdy.
Ózbek áýejaıyndaǵy ózgerister
Jańa Samarqand áýejaıyn basqarýdy jeke seriktestikke berý jolaýshylar aǵynynyń tórt esege artyp, bir jylda mıllıon adamǵa jetýine yqpal etti. Buhara, Namangan, Úrgenish jáne Ándijan áýejaılary jeke basqarýǵa berilip, jańartylady. Ónerkásip shyǵyndaryn 20%-ǵa qysqartý sharalaryn qabyldaıdy. Janarmaı shyǵyny joǵary eski ushaqtar satylyp, zamanaýı ári únemdi ushaqtar ákelinetin bolady. 72 baǵyt boıynsha ońtaıly ushý baǵytyn tańdaý arqyly janarmaı shyǵyny aıtarlyqtaı tómendeıdi. Paıdalanylmaıtyn jáne kiris ákelmeıtin aktıvter satylymǵa shyǵarylady.
Rıeltorlardy baqylaý kerek!
Depýtat rıeltorlardy baqylaýǵa alýdy talap etýde. QR Premer-Mınıstriniń orynbasary – Úkimet Apparatynyń basshysy Ǵalymjan Qoıshybaevqa saýal joldaǵan depýtat Oljas Quspekov osy týraly aıtty.
«Másele mynada, klıentterdi quldyqqa túsiretin sharttar, keıbir «erekshe sharttar» menshik ıelerin óz múlkine bılik etý quqyǵynan aıyrady. Qazaqstandyqtar «arbıtrajdyq baptan» kóp zardap shegedi. Bul barlyq janjaldar tek arbıtrajda, ıaǵnı jeke sotta sheshiledi degen sóz. Biraq, sýdıalardan aıyrmashylyǵy, arbıtrler eshqandaı jaýapkershilik kótermeıdi jáne olardy sóz baılasýdan, sybaılastyqtan, aldaý men alaıaqtyqtan eshteńe toqtata almaıdy. Arbıtrajda sheshiletin barlyq daýlar rıeltorlyq kompanıalardyń paıdasyna sheshildi. Memlekette rıeltorlardy da, arbıtrajdyq sottardy da baqylaýdyń eshqandaı quraldary joq, bul azamattardyń quqyqtaryn qorǵaýdy tolyq qamtamasyz etýge múmkindik joq degendi bildiredi», - dep túsindirdi depýtat.
UQK terorızmdi nasıhattaǵan azamatty ustady
Shymkentte UQK qyzmetkerleri radıkaldy ıdeologıany nasıhattaýshyny ustady. Ustalǵan azamatqa qatysty Qylmystyq kodekstiń 256-baby 2-bóligi boıynsha qylmystyq is qozǵaldy. 256-baptyń osy bóliginiń sanksıasy múlki tárkilenip, jeti jyldan 12 jylǵa deıingi merzimge bas bostandyǵynan aıyrýdy kózdeıdi.
Ýaǵyz aıtatyn aýyz
Quran ustap, taspıh tartqannyń bári ýaǵyz aıta almaıtyn boldy. Ýaǵyzshylardyń Astana ótken alǵashqy forýmynda Bas múftı jamaǵatqa adal men aramnyń ara jigin ajyratyp, jalpaq jurtqa ýaǵyz aıtatyn moldalardyń tuǵyrnamasyn bekitti.
«Mundaǵy basty maqsat – eldi adastyryp teris jolǵa baǵyttaǵan dinı qyzmetkerlerdiń, ýaǵyzshylardyń izin kesý» deıdi Naýryzbaı qajy Taǵanuly.
Air Astana-nyń kestesi ózgerdi
Qazaqstanda biryńǵaı ýaqyt beldeýine kóshýge baılanysty Air Astana reıster kestecine ózgerister engizdi. Ózgerister 1-31 naýryz aralyǵynda Almaty, Astana, Shymkent, Óskemen jáne Qostanaı baǵyttary boıynsha josparlanǵan baǵyttarǵa qatysty. Reısteri ózgeriske ushyraıtyn jolaýshylarǵa ózgertilgen ushý ýaqyty týraly SMS-habarlamalar men brondaý kezinde qaldyrǵan elektrondyq poshtalaryna hattar jiberiledi.
Metronyń kestesi ózgermeıdi
Saǵat beldeýiniń aýysýy kezinde Almaty metropolıteni shtattyq rejımde, kestesi ózgerissiz qyzmet kórsetedi. 29 aqpannan 1 naýryzǵa qaraǵan túni Almaty ýaqytymen saǵ.00-10-ǵa deıin jumys jasap, al 1 naýryz kúni jańa beldeý boıynsha saǵ. 06-20-da metro qaıta iske qosylatyn bolady.