Almaty prokýratýrasy 2019-2023 jyldarǵa ulttyq kınony qoldaýǵa bólingen búdjet qarajatyn ıgerýge qatysty tekseris júrgizdi, dep habarlaıdy aqshamnews.kz.
«Ulttyq fılmderdiń qarjysy tıimsiz ıgerilgeni anyqtaldy. 2019-2021 jyldar kezeńinde «Vybor» kınofılmine 500 mıllıon teńge bólindi. Alaıda atalǵan fılm prokatqa sol kúıi shyqpady», - dep málimdedi prokýratýra.
«Kınematografıa týraly» Qazaqstan zańynyń 12-baby, 1-tarmaǵyna saı, memlekettik qarjylyq qoldaý, ulttyq fılmderdi jáne soǵan baılanysty is-sharalardy shyǵarýdy, prokattaýdy jáne kórsetýdi uıymdastyrý, sondaı-aq ulttyq fılmderdi shetelde kórsetý úshin usynylady. Onyń ústine, atalǵan fılmge prokattaý kýáligi alynbaǵan, bul zańǵa qaıshy keledi.
Memleket zańnamada kózdelgen prokattan jáne fılm kórsetiliminen túsetin kiristiń 20 paıyzyn alý múmkindiginen aıyrylǵan.
Sonymen qatar 421 mıllıon teńgege qarjylandyrylǵan «Tyrnalar» fılmi prokatqa shyqqan joq.
«2019 jyldan bastap fılmder monıtorıńiniń biryńǵaı avtomattandyrylǵan aqparattyq júıesi qoldanysqa engizilmegen, ol eldiń barlyq kınoteatrlarynda kınokórsetilimder men satylǵan bıletter boıynsha, sondaı-aq fılmniń búdjeti boıynsha statısıkany qadaǵalaýǵa múmkindik berer edi», - dep málimdedi Almaty prokýratýrasynyń baspasóz qyzmeti.
Qadaǵalaý aktisi boıynsha mádenıet jáne aqparat mınıstrligi mádenıet komıteti tóraǵasynyń orynbasary, sondaı-aq «Ulttyq kınony qoldaý memlekettik ortalyǵy» KEAQ basqarma tóraǵasynyń orynbasary Azamat Belqaıyrov tártiptik jaýapkershilikke tartyldy.